Տավուշի մարզի տարածքով ձգվող միջպետական ավտոճանապարհը շատ տեղերում կիսաքանդ վիճակում է: Դիլիջան-Իջեւան ճանապարհի որոշ հատվածներում բազմաթիվ փոսեր կան, փոսերը ծածկելու համար լցված հողը անձրեւը քշում-տանում է:
Առավել վատթար վիճակում է 2001-2002 թթ. Լինսի հիմնադրամի միջոցներով կառուցված, սահմանագոտին շրջանցող, Ոսկեպար-Կիրանց 11 կմ երկարությամբ ճանապարհը: Նախկինում Հայաստան բեռներ ներկրող խոշոր բեռնատարները Երեւան էին հասնում Բագրատաշեն-Վանաձոր ճանապարհով: 2016թ. սեպտեմբերի 14-ից վերանորոգման նպատակով փակ է միջպետական ավտոճանապարհի Վանաձոր-Ալավերդի հատվածը:
Դրանից հետո 40 տոննանոց «ֆուռերը» երթեւեկում են Բագրատաշեն-Նոյեմբերյան-Իջեւան ճանապարհով: Այդ ճանապարհի մաս կազմող Ոսկեպար-Կիրանց շրջանցիկ հատվածի ասֆալտի բարակ շերտը չի դիմացել ծանրաքարշ մեքենաների ճնշմանը: 15 տարի առաջ կառուցված ճանապարհի ասֆալտի ծածկը շատ տեղերում քանդվել, ձեւախեղման է ենթարկվել: Վարորդները փորձելով խուսափել փոսերից՝ հայտնվում են հանդիպակաց գոտում, վթարային իրավիճակ է ստեղծվում:
Կարդացեք նաև
Մարտի 18-ին վարչապետ Կարեն Կարապետյանը կայցելի Տավուշի մարզ: Վարչապետը կնկատի՞ միջպետական ավտոճանապարհի կիսաքանդ վիճակը:
Ոսկան ՍԱՐԳՍՅԱՆ
