Ռուսաստանը պատրաստ է աջակցել Հայաստանի և Թուրքիայի միջև բանակցություններին, երբ դրանք վերսկսվեն: Այս մասին հայտարարել է ՌԴ ԱԳ նախարար Սերգեյ Լավրովը Regional Post- Caucasus ամսագրին տված հարցազրույցում, որի տեքստը հրապարակվել է ՌԴ արտգործնախարարության կայքում:
Լավրովը հիշեցրել է, որ Ռուսաստանը կարևոր դերակատարում է ունեցել 2007-2009 թվականներին Հայաստանի եւ Թուրքիայի միջեւ երկխոսության վերսկսման գործում: Նրա խոսքով՝ այժմ հայ-թուրքական հարաբերությունների բարելավման գործընթացը դադարեցված է:
«Բնականաբար, մենք միայն կողջունեինք, որ Եվրասիական տնտեսական միության արտաքին սահմանի հայ-թուրքական հատվածը բացվի մարդկանց, ապրանքների և ծառայությունների ազատ տեղաշարժման համար: Դա, անկասկած, օգուտ կբերի ամբողջ տարածաշրջանին»,- ընդգծել է Լավրովը:
Ռուսաստանի արտգործնախարարը վստահություն է հայտնել, որ Հայաստանը և Թուրքիան ունակ են կարգավորել առկա խնդիրները: «Միևնույն ժամանակ շատ բան է կախված հենց իրենցից»,-հավելել է ՌԴ ԱԳ նախարարը:
