Այսօր վարչապետ Կարեն Կարապետյանը կառավարության նիստին անդրադարձավ մատակարարվող նավթամթերքի որակի ուսումնասիրություններին: Վարչապետն ասաց, որ այդ ուսումնասիրությունների արդյունքում վեր են հանվել բենզինի եւ դիզելային վառելիքի որակի վերաբերյալ խնդիրները. «Նշված խնդիրը հաճախ պայմանավորվում է վառելիքի տեսակների ոչ հստակ տարանջատմամբ: Արդյունքում էական վնաս է պատճառվում սպառողներին և շուկային»:
Կարապետյանը տնտեսական զարգացման եւ ներդրումների նախարար Սուրեն Կարայանին հանձնարարեց՝ մեկ ամսում բենզինի, դիզվառելիքի եւ այլ վառելանյութերի վաճառքի ոլորտում չարաշահումների վերացման եւ վերահսկման գործառույթներն ավելի արդյունավետ իրականացնելու նպատակով կառավարության աշխատակազմ ներկայացնել առաջարկություն` համապատասխան թույլտվությունները ըստ վառելիքի տեսակների տարանջատման վերաբերյալ` հաշվի առնելով շուկայում դրանց սպառման փաստացի կառուցվածքը: Վարչապետը հանձնարարեց ՊԵԿ-ի հետ մշակել այս ոլորտում խնդիրները վերահանելու եւ կանխարգելելու մեթոդաբանություն:
Նելլի ԲԱԲԱՅԱՆ
