«Երևանը դարձել է օտար լեզուների քաղաք, խնդրանքով ուզում եմ դիմել, որ Կրկեսի մոտի հյուրանոցը միայն անգլերեն լեզվով է, բա ՀՀ պետական լեզուն ո՞վ պետք է պահպանի: Կխնդրեի, որպեսզի Ձեր հանձնարարությամբ և պարոն քաղաքապետի հանձնարարությամբ սեփականատիրոջն ասվի, որ պետական լեզվի խախտում կա, կարգավորել: Երևանում ամեն քայլափոխի քաղաքում տեսնում ենք խանութների վրա open, hotel, motel, բա մեր լեզուն ի՞նչ պետք է լինի»,-այսօր Երեւանի Էրեբունի համայնքում վարչապետին այսպես դիմեց Լեզվի պետական տեսչության նախկին պետ Լավրենտի Միրզոյանը:
Վարչապետն ասաց` հասկացավ, որ Լավրենտի Միրզոյանն արդեն կողմնորոշվել է, թե ո՞ւմ է տալու իր ձայնն ապրիլի 2-ին: «Իրականում մեր հայ լինելը պահպանել ենք երեք սկզբունքների պատճառով՝ ընտանիքը, հավատքը և լեզուն: Կարևոր է, որ լեզուն պահպանենք, նույնիսկ սփյուռքահայության մեջ, որ տեսնում ենք լեզուն կորցնում են՝ անհանգստանում ենք: Այդ իսկ պատճառով միանշանակ դրան ուշադրություն դարձնելու ենք»,-ասաց Կարեն Կարապետյանը`հավելելով, որ լեզվի նկատմամբ մեր վերաբերմունքը պետք է լինի ուշադիր, բայց քաղաքը նաև հյուրերի համար ընկալելի պիտի լինի:
Հանդիպման եկած մի քաղաքացի էլ վարչապետին հարցրեց`ի՞նչ եք անելու, որ երիտասարդները ամուսնանան: Խնդիրը, քաղաքացու մեկնաբանմամբ, սոցիալական է: «Մեր ծրագրի մեջ ենթածրագիր չկա, որ մենք հատուկ անելու ենք այնպես, որ երիտասարդներն ամուսնանան, բայց որպես ածանցյալ դա էլ է լինելու, մեր ծրագիրն ուղղված է լինելու նրան, որ տնտեսությունը զարգանա, աշխատատեղեր ստեղծվեն, որ երիտասարդն էլ այդ խնդիրները չունենա»,- պատասխանեց Կարեն Կարապետյանը:
Վարչապետը նաեւ հավելեց, որ երիտասարդներն այսօր խնդիր ունեն նաեւ պետական ծառայությունում աշխատելու. շատ դեպքերում պահանջվում է փորձ, որը երիտասարդը չի կարող ունենալ: «Իսկ մենք, պետական համակարգում կրակոտ, էներգիայով լի մարդկանց կարիք ունենք»,-ասաց վարչապետը: Լուծումը, վարչապետի պատկերացմամբ սա է. «Մենք մեր տնտեսությունն ուղղակի պետք է բարձրացնենք, արժանավայել աշխատավարձ ու թոշակ ստանալ ենք ուզում, միայն այդ դեպքում են լուծվելու այս խնդիրները»:
Կարդացեք նաև
Նելլի ԳՐԻԳՈՐՅԱՆ
