Հայաստանի Հանրապետության պաշտպանության նախարար Վիգեն Սարգսյանը հարցազրույց է տվել Russia Today ռուսական միջազգային հեռուստաալիքին՝ անդրադառնալով տարածաշրջանում անվտանգության ոլորտում առկա խնդիրներին, այդ թվում արցախյան հակամարտության կարգավորմանը:
Խոսելով Հայաստանի անվտանգության հիմնական սպառնալիքների մասին՝ Վիգեն Սարգսյանը նշել է, որ բոլորին հայտնի է այն, որ Հայաստանը հանդիսանում է Արցախի ժողովրդի ֆիզիկական անվտանգության երաշխավորը: Նա ընդգծել է, որ ամեն օր ոչ միայն Արցախի և Ադրբեջանի զորքերի հակամարտ շփման գծում, այլ նաև Հայաստանի և Ադրբեջանի պետական սահմանի վրա տեղի են ունենում սադրանքներ:
«Բայց եթե խոսենք ավելի գլոբալ, ես պարզապես վստահ եմ, որ Հայաստանի համար գլխավոր մարտահրավերը ժողովրդավարական բարեփոխումների լիարժեք իրականացումն է, որովհետև կառավարման համակարգը, որը հիմնված է քաղաքացիական հասարակության ներգրավվածության բաց մեխանիզմների, բոլոր ժողովրդավարական ինստիտուտների գործունեության վրա, անկասկած, երկրի անվտանգության ամենակարևոր երաշխիքներից է»,-ընդգծել է Սարգսյանը՝ հավելելով, որ Հայաստանն ակտիվորեն ներգրավված է մի շարք երկկողմ և բազմակողմ ձևաչափերում, նախևառաջ ՀԱՊԿ-ի շրջանակում, ինչպես նաև համագործակցում է Հյուսիսատլանտյան դաշինքի հետ՝ մասնակցելով խաղարարական գործողությունների:
Վիգեն Սարգսյանի խոսքով՝ արցախյան հակամարտության լուծումը գտնելու համար հարկավոր է լիովին հասկանալ հարցի բնույթը: «Լեռնային Ղարաբաղի խնդրի լուծումը Լեռնային Ղարաբաղի ժողովրդի ինքնորոշման իրավունքի ճանաչումն է՝ պետության ճանաչման միջոցով: Չնայած ճանաչված չլինելուն՝ Ղարաբաղը կարողացել է ապացուցել, որ անգամ այդ պայմաններում հնարավոր է կառուցել անվտանգության, դատական իշխանության համակարգեր և երկրի կառավարման ժողովրդավարական ինստիտուտներ: Եվ ես կարծում եմ, որ առանց այդ իրողությունները լիարժեք հաշվի առնելու՝ Լեռնային Ղարաբաղի խնդրի լուծումը պարզապես անհնար է »,-շեշտել է ՀՀ ՊՆ նախարարը:
Կարդացեք նաև
Անդրադառնալով Մերձավոր Արևելքում ստեղծված իրավիճակին, մասնավորապես, սիրիական հակամարտությանը, արմատական իսլամիզմի տարածման՝ Վիգեն Սարգսյանն ասել է, որ այս տարածաշրջանում տեղի ունեցող իրադարձությունները չեն կարող չանհանգստացնել Հայաստանին, քանի որ այն ավանդաբար եղել է տուն հայկական մեծ սփյուռքի համար: Նա փաստել է, որ Հայաստանն ունի բավականաչափ խորը և պատմական հարաբերություններ իսլամական աշխարհի, այդ թվում՝ Իրանի հետ, ինչպես նաև սերտ փոխգործակցություն արաբական աշխարհի շատ երկրների հետ:
«Այն, ինչ այսօր տեղի է ունենում Սիրիայում, չի կարող չանհանգստացնել յուրաքանչյուր հայի: Գիտեք, որ մինչ այժմ Հալեպում գոյություն ունի ամենախոշոր հայկական սփյուռքից մեկը, Հայաստանը միակ երկիրն է, որ մինչ այժմ շարունակում է Հալեպում իր հյուպատոսության աշխատանքը: Եվ չնայած բոլոր դժվարություններին՝ մենք Ռուսաստանի հետ իրականացնում ենք Սիրիա մարդասիրական օգնության մատակարարման հետ կապված մի շարք նախագծեր, և դա մեր պարտքն ենք համարում:
Բնականաբար, մեր օրերում տարածաշրջանի ընկալումը շատ է փոխվել, որովհետև եթե հարցնեք մարդկանց Հայաստանում, կարծում եմ նաև Վրաստանում ու Ադրբեջանում՝ ի՞նչ է տարածաշրջանը, հավանաբար նրանք կնշեն հենց այդ երեք երկրները, որովհետև հենց հետխորհրդային ընկալման մեջ տարածաշրջանն Անդրկովկասյան կամ ինչպես այն այժմ անվանում են՝ Հարավկովկասյան տարածաշրջանն է: Բայց իրականությունն այն է, որ Մերձավոր Արևելքը գտնվում է այստեղից մեկուկես-երկու ժամվա թռիչքի հեռավորության վրա: Եվ բնականաբար ամենը, ինչ տեղի է ունենում այնտեղ, չի կարող ուղղակիորեն չազդել մեր տարածաշրջանի անվտանգության համակարգի վրա»,-ասել է Վիգեն Սարգսյանը:
Պատրաստեց՝ Վիկտորյա ԱՆԴՐԵԱՍՅԱՆԸ
https://www.youtube.com/watch?v=5aO92q7_h3g
