Գորիսում այս պահին ՕՐՕ դաշինքի անդամները քարոզարշավ են իրականացնում: Արմեն Մարտիրոսյանը գորիսցիների հետ հանդիպմանը անդրադարձավ Ջրառատի կրակոցներին:
Նա ասաց. «Այսօր տհաճ շարունակություն է ունեցել Ջրառատի դեպքը եւ հրազենային վիրավոր կա արդեն մեր համակիրների շրջանում, բայց մենք չենք հրաժարվելու մեր պայքարից: Իշխանությունների ցանկացածը չենք անելու՝ հրաժարվելու մեր պայքարից, որովհետեւ մենք մեր մոտեցումները պետք է անպայման հասցնենք ամբողջ Հայաստանին»:
Արմեն Մարտիրոսյանն ասաց, որ ոստիկանությունը պետք է ծառայի բացառապես օրենքին եւ ժողովրդին. «Այն, ինչ տեղի է ունեցել Ջրառատում, որոշ ոստիկանների անպատժելիության հետեւանք է: Խստիվ դատապարտում ենք դա եւ պահանջում ենք օրինականության վերականգնում: Ըստ էության, իշխանությունները այլեւս, կարելի է ասել, տապալել են նորմալ ընտրություններ անցկացնելու իրենց վրա դրված օրինական պարտականությունը եւ միջազգային գործընկերների կողմից իրենց վրա դրված պարտականությունը: Եթե երկու օր առաջ Լեւոն Երանոսյանի եղբայրը, որը հասարակությունից գաղտնի վերականգնվել էր ծառայության մեջ, պատժվեր՝ անօրինական զենք կրելու, մարդկանց տան վրա հարձակվելու համար, այսօր այդ դեպքը չէր լինելու:
Ոստիկանությունը չպետք է երբեւիցե լինի պատժիչ օղակ՝ հասարակության վրա: Այդ հասարակությունն է, որ իր հարկերից նրանց աշխատավարձ է տալիս: Ոստիկանության դերը պետք է լինի հանցագործության դեմ պայքարը, ոչ թե անօրինական իշխանությունների պաշտպանությունը ստանձնելը»:
Կարդացեք նաև
Արմեն Մարտիրոսյանը վստահեցրեց, որ իրենք վերականգնելու են ՀՀ-ում արդարությունը:
Հռիփսիմե ՋԵԲԵՋՅԱՆ
