Հայաստանի կոմունիստական կուսակցության ցուցակով առաջադրված պատգամավորի թեկնածու Ռուբեն Բալաբանյանը խոստանում է անկախ ու անաչառ դատարաններ, եթե կոմկուսը խորհրդարան անցնի:
«Դատարանների աշխատանքի բարելավում, դատավորի անկախության ամրապնդման ուղղությամբ օրենքների ընդունում, այսօր օրենսդրության մեջ այնպիսի բացեր կան, որոնք քաղաքացիների դժգոհության առիթ են դառնում»,- «Հայելի» ակումբում ասաց պարոն Բալաբանյանը:
Ըստ նրա, հիմա չկան հստակ ժամկետներ օրենքով կարգավորվող մի շարք խնդիրների համար՝ օրինակ երեխայի ալիմենտի ժամկետ չկա, որը կար կոմունիստների ժամանակ:
Հարցին՝ ինչքանո՞վ են արդիական հիմա կոմունիստների գաղափարները, պատգամավորի թեկնածուն պատասխանեց. «Այն գաղափարները, որոնք առաջ ենք քաշում, այդ գաղափարները հաջողությամբ կիրառվում են ԱՄՆ-ում, Ֆրանսիայում, մենք հրաժարվեցինք այդ գաղափարներից, իսկ դրանք միշտ արդիական ու կիրառելի են, չկա արգելք դրանց կիրառման համար»:
Կարդացեք նաև
Ինչպե՞ս եք փրկելու մեր տնտեսությունը հարցին, պարոն Բալաբանյանը պատասխանեց. «Խնդիրը հարկային պարտավորություններից խուսափելն է, ստվերային տնտեսություն ունենք, հարկ չեն վճարում, իրենց աշխատանքի լուման չեն դնում պետբյուջե, օրենքներ են պետք»:
Պատգամավորի թեկնածու Իրինա Հովակիմյանն էլ սկսեց իր կենսագրությունը պատմել, ասաց՝ կոմունիստական ոգով է դաստիարակվել. «Մինչեւ օրս հավատարիմ եմ այդ գաղափարներին, որոնք մարդասիրական գաղափարներ են՝ սեր, հարգանք, օգնություն»:
Մեր հարցին՝ ինչու են իրենց ցուցակում գերակշռում թոշակառուները, տիկին Հովակիմյանը զարմացավ. «Միայն թոշակառուներ չեն, Թրամփը որ դարձավ ԱՄՆ նախագահ այդ տարիքում, հիմա ԱԺ մտնելը այդ տարիքի մարդկանց համար ի՞նչ խնդիր է, բոլորն էլ գիտեն աշխատել, օգնել մյուսներին, մեծ դժվարություն չէ, մենք սերունդ պետք է դաստիարակենք, մեր պահանջներն արդարամիտ են, ներկայիս երիտասարդությանը կարող ենք հավատացնել, մեր շարքերն ընդգրկել… ձեր կարծիքով Թրամփը թոշակառու չէ՞, ի՞նչ անենք, բայց ուղեղն աշխատում է»:
Արփինե ՍԻՄՈՆՅԱՆ
