Այսօր Եղեգնաձորում նախընտրական քարոզարշավի ժամանակ ՕՐՕ դաշինքը գլխավորող ՊՆ նախկին նախարար Սեյրան Օհանյանը խոսեց բանակում իր արած աշխատանքների մասին, կոռուպցիան նվազեցնելու մասին, նա ասաց, որ ապրում է այս սկզբունքով՝ կյանքս՝ հայրենիքիս, պատիվս՝ ոչ մեկին, հետեւաբար թույլ չի տալու, որ ժողովրդի պատվին դիպչեն:
Եղեգնաձորցիներից մեկն ասաց, որ բոլորն էլ լավ խոստումներ են տալիս, բայց իրական փոփոխություն չեն տեսնում: Սեյրան Օհանյանը պատասխանեց. «Մենք 5 տարին մեկ չէ, այլ՝ պարբերաբար վստահության հանրաքվե ենք կազմակերպելու: Եթե ժողովուրդը վստահեց մեզ, որ մենք շարունակենք, կշարունակենք, եթե չվստահի՝ կթողենք դուրս կգանք: Իմ կյանքի 55 տարիների ընթացքում ես ձեռք եմ բերել արժանապատվություն ու ինձ համար ոչինչ արժանապատվությունից բարձր չի»:
Նա ասաց, որ կառավարման համակարգում լինելով՝ թերությունները տեսել են: Կարող էին կողքից նայել, թե ինչպես է ժողովուրդը տուժում, բայց լավը ո՞րն է, կողքից նայե՞լը, թե՞ լուծելը: Նա վստահեցրեց, որ ինչպես հանգիստ նայել է իր զինվորների աչքերին, նույն ձեւ արդար աչքերով նայելու է հենց իր՝ այդ եղեգնաձորցու եւ ժողովրդի աչքերին:
Հռիփսիմե ՋԵԲԵՋՅԱՆ
