«Փաստարկ« մամուլի ակումբում այսօր Aravot.am-ը «ԵԼՔ» դաշինքի պատգամավորի թեկնածուներից հետաքրքրվեց, թե մասնավորապես բանակաշինության ուղղությամբ ինչ են առաջարկում իրենց նախընտրական ծրագրով: Տիգրան Ավինյանը նշեց, որ ռազմարդյունաբերության զարգացումը ծրագրի հիմնասյուներից է. «ՀՀ-ում ինժեներական եւ ծրագրավորման հմտությունների տիրապետող մարդկանց խիտ քանակ կա, ինչը լրջագույն հարստություն է: Համոզված ենք, որ կարելի է զարգացնել ռազմարդյունաբերություն՝ կարճաժամկետ եւ երկարաժամկետ ծրագրերով»:
«ԵԼՔ»-ի թեկնածուի փոխանցմամբ՝ դաշինքն առաջարկում է առաջիկա հինգ տարում արագացնել սպաների համար բնակարանաշինության ծրագրի կատարումը. «Հինգ տարում նաեւ հնարավոր է առաջնագծում տեղակայել մասնագիտացված զինծառայողների՝ հատուկ աշխատավարձով»:
Դաշինքի թեկնածուներից Լենա Նազարյանն էլ անդրադարձավ այն ծրագրային կետին, որ յուրաքանչյուր քաղաքացի պետք է իրեն կցված զենք ունենա. «Զենքը չի գտնվելու նրանց մոտ, այլ պահվելու է սահմանված տեղերում, քաղաքացիներն էլ դրանք ստանալու են անհրաժեշտության դեպքում: Նրանք տեղյակ են լինելու՝ ո՞ւր գնալ, ո՞ւմ դիմել եւ ինչպե՞ս ստանալ»:
Այս հարցի առնչությամբ Տիգրան Ավինյանը հավելեց, որ նախատեսում են տարին երկու անգամ քաղաքացիների համար կազմակերպել նախապատրաստական զորավարժություններ՝ համապատասխան կրթական ծրագրով:
Կարդացեք նաև
Այլ մանրամասները՝ տեսանյութում:
Լուիզա ՍՈՒՔԻԱՍՅԱՆ
