Թուրքիան պատրաստվում է Նիդերլանդների դեմ բողոքի հայց ներկայացնել միանգամից երեք միջազգային կազմակերպությունների՝ ՄԱԿ, ԵԱՀԿ և Եվրոպայի Խորհուրդ: Այս մասին հաղորդում է Hurriyet Daily News պարբերականը՝ վկայակոչելով իր դիվանագիտական աղբյուրներին:
Աղբյուրների տվյալներով՝ Թուրքիան նախատեսում է վերոնշյալ միջազգային ինստիտուտներին դիմել այն կապակցությամբ, որ Նիդերլանդները, ինչպես կարծում են թուրքական իշխանությունները, խախտել են դիվանագիտական հարաբերությունների մասին Վիեննայի կոնվենցիայի դրույթները:
Ավելի վաղ Թուրքիայի նախագահ Ռեջեփ Թայիփ Էրդողանը Նիդերլանդներին սպառնացել է դիվանագիտական պատժամիջոցներով և հայտարարել, որ պատրաստ է դիմել Մարդու իրավունքների եվրոպական դատարան՝ թուրք նախարարների ելույթներն արգելու համար:
«Մենք ձեզ հետ կվարվենք ճիշտ այնպես, ինչպես դուք վարվեցիք մեզ հետ: Մենք թույլ չենք տա նիդերլանդցի դիվանագետներին ու դեսպաններին տեղափոխող ինքնաթիռներին օգտվել մեր օդային տարածքից կամ վայրէջք կատարել մեզ մոտ»,- իր հերթին հայտարարել է փոխվարչապետ Նուման Քուրթուլմուշը:
Կարդացեք նաև
Պատրաստեց՝ Վիկտորյա ԱՆԴՐԵԱՍՅԱՆԸ
