«Պոստ սկրիպտում» մամուլի ակումբում այսօր Aravot.am-ը քաղաքագետ Արա Պապյանին խնդրեց կարծիք հայտնել «Կոնգրես-ՀԺԿ» դաշինքի նախընտրական ծրագրի՝ «խաղաղության ծրագրի» մասին, որի հիմքում Արցախյան հակամարտության լուծման փոխզիջումային տարբերակն է:
Արա Պապյանը նախ հիշեցրեց, որ «Կազանյան փաստաթուղթը» բացահայտված է եւ դրա վրա է հիմնված «Մադրիդյան սկզբունքների» փաստաթուղթը: «Կազանի փաստաթղթով, որին ժամանակին համաձայնություն տվեց Սերժ Սարգսյանը, առաջին փուլում հանձնելու ենք հինգ շրջաններ, Քարվաճառը եւ Լաչինը՝ բացառությամբ Լաչինի միջանցքի»,-ասաց Արա Պապյանը:
Դրանից հետո, քաղաքագետի փոխանցմամբ, տեղի է ունենալու ադրբեջանցի փախստականների վերադարձ ԼՂԻՄ-ի տարածք, ընդ որում, ըստ ադրբեջանական կողմի, նրանց թիվը մինչեւ 600 հազար է, այսինքն՝ ադրբեջանցիները մեծամասնություն են կազմելու: «Դրանից հետո չեմ կարծում, որ հարցը հանրաքվեի հասնի, որովհետեւ եթե նշյալը տեղի ունենա, բախումներն ու պատերազմը կդառնան անխուսափելի: Ակնհայտ է, որ այդ յոթ շրջանների հանձնումից հետո, որոնք հայկական կողմից գրավվել էին որպես անվտանգության գոտի, անվտանգության երաշխիքներ չեն ավելանում: Շատերն են ասում՝ չեն մնա այն գյուղերում, որոնք այդ դեպքում դառնում են ռազմաճակատային: Այդպես հարվածի տակ ենք դնում ոչ միայն Արցախի, այլեւ Սյունիքի բնակչությանը»,-նկատեց Արա Պապյանը:
Նրա գնահատմամբ՝ տարածքներ հանձնելու ճանապարհով հնարավոր չէ խաղաղության հասնել. «Խաղաղություն բառն օգտագործում են՝ փորձելով ձայներ կորզել, եւ փորձում են Ռուսաստանին ուղերձ հղել, թե՝ օգնեք մեզ իշխանության գալ, եւ մենք կանենք ինչ ուզում ենք: Սա Արցախի հարցի շահարկում է՝ ընտրական փուլում»:
Կարդացեք նաև
Արա Պապյանի բնորոշմամբ՝ անգամ ՀԱԿ-ի մատնանշած՝ խաղաղության պայմանագրի կնքման դեպքում երաշխիք չկա, որ Ադրբեջանը չի հարձակվելու, քանի որ այդ պետությունը ոչ միայն Արցախն է ուզում, այլեւ Երեւանը:
Հետաքրքվեցինք նաեւ, թե արդոք Տիգրան Մեծը հող հանձնո՞ղ է, ինչպես «Կոնգրես-ՀԺԿ» դաշինքի թեկնածուն էր մատնանշել: Քաղաքագետը նշեց, որ Տիգրան Մեծը այլ երկրների հողեր էր գրավել եւ դրանցից հրաժարվելով՝ պահպանեց Հայաստանը:
Մանրամասն՝ տեսանյութում:
Լուիզա ՍՈՒՔԻԱՍՅԱՆ
