Ռուսաստանում կարող է սահմանվել քաղաքացիություն ստանալու նոր սկզբունք՝ հիմնված այսպես կոչված «արմատների իրավունքի» վրա: Այս մասին RIA Novosti գործակալությանը հայտնել է Պետդումայի ազգությունների հարցերով հանձնաժողովի նախագահի տեղակալ Ռուսլան Բալբեկը:
Նրա խոսքով՝ նման նախաձեռնություն է պարունակում խորհրդարանականներ Կոնստանտին Զատուլինի և Նատալյա Պոկլոնսկայայի ներկայացրած օրինագիծը, որն արդեն արժանացել է ազգությունների հարցերով հանձնաժողովի հավանությանը:
«Այդ օրենքի ընդունման դեպքում Ռուսաստանի Դաշնության քաղաքացիություն հնարավոր կլինի ստանալ ոչ միայն արյան, ազգության, այլև՝ արմատների սկզբունքով: Հիմնական չափանիշը կլինի ռուսերենի իմացությունը, ինչպես նաև որպես հիմք կընդունվի Խորհրդային միության և Ռուսական կայսրության տարածքների հետ կապը»,- ասել է Բալբեկը:
Այսպիսով, Բալբեկի խոսքով՝ ռուսական քաղաքացիության ձեռքբերման հեշտացված ընթացակարգի իրավունք կստանան ռուսերենին տիրապետողները՝ ժամանակին ԽՍՀՄ-ի կամ Ռուսական կայսրության կազմի մեջ մտնող հետխորհրդային տարածքի երկրների բնակիչները կամ նրանց բարեկամները:
Պատրաստեց՝ Վիկտորյա ԱՆԴՐԵԱՍՅԱՆԸ
