Հայաստանում երեխաները իրենց ապագա մասնագիտության մասին սկսում են մտածել դեռևս շատ վաղ տարիքից՝ վեց ամսականից: Այս մասին գրում է The New York Times թերթը՝ պատմելով «Ատամհատիկ» հայկական ծեսի մասին:
Ավանդույթի համաձայն, երբ երեխայի առաջին ատամը դուրս է գալիս, ծնողները նրա առաջ տարբեր առարկաներ են դնում, որոնք խորհրդանշում են տարբեր մասնագիտություններ. բարձրախոս, բժշկական սարքավորումներ, մկրատ կամ փող: Առաջին ընտրած առարկան խոսում է երեխայի ապագա մասնագիտական նախասիրությունների մասին՝ ասվում է հոդվածում:
«Ատամհատիկ»-ի սկզբում երեխայի վրա ցորենի, գարու, սիսեռի հատիկներ են լցնում, որպեսզի նա չվախենա, նրա գլխավերևում կտոր կամ անձրևանոց են պահում:
«Ատամհատիկ»-ը նշում են ինչպես Հայաստանի բնակիչները, այնպես էլ հայկական սփյուռքը: Հոդվածում նշվում է նաև, որ հին ժամանակներում երեխայի առաջ ընդամենը երկու առարկա էին դնում՝ դանակ և սանր (կամ հայելի), որը խորհրդանշում էր ոչ թե ապագա մասնագիտությունը, այլ հաջորդ երեխայի սեռը: Եթե երեխան դանակ էր վերցնում, ապա նա եղբայր կունենար, իսկ սանր վերցնելու դեպքում՝ քույր:
Պատրաստեց՝ Վիկտորյա ԱՆԴՐԵԱՍՅԱՆԸ
