«Ելք» դաշինքը, որն այսօր նախընտրական քարոզարշավն անցկացրեց Արաբկիր համայնքում, անցավ բակերով՝ քաղաքացիներին կոչ անելով ընտրել «Ելք»-ին, քանի որ «հանրապետականների ստեղծած այդ ճահճից միակ ելքը «Ելքին» ընտրելն է»:
«Ելքի» առաջնորդներից Նիկոլ Փաշինյանը բակից բակ անցնելու ժամանակ զրույցի էր բռնվում քաղաքացիների հետ: Նա վստահեցրեց, որ «Ելք»-ը, խորհրդարան անցնելու դեպքում, ոչ մի պարագայում ՀՀԿ-ի հետ կոալիցիա չի կազմի: Արաբկիրցիներից մեկը պարոն Փաշինյանին խորհուրդ տվեց խորհրդարանում մնացած ուժերի հետ միավորվել եւ ՀՀԿ-ից ազատվել:
Ի պատասխան Նիկոլ Փաշինյանն ասաց՝ «Եթե մենք խորհրդարանում տեսանք, որ կա շանս առանց ՀՀԿ-ի կոալիցիա ձեւավորել եւ մեծամասնություն կազմել ու իշխանափոխություն անել, մենք կգնանք էդ ճանապարհով»: Քաղաքական անցուդարձից տեղյակ քաղաքացին իր կարծիքը հայտնեց՝ «Նախկին դաշնակցականները նրանց հետ են, Արթուրը նրանց օգտին է քվեարկելու այսինքն՝ մեծամասնություն կկազմեն, էլ ո՞նց կազատվեք նրանցից»: Ի պատասխան Նիկոլ Փաշինյանն ասաց. «Հիմա էդ ուժերը, որ ասում են ընդդիմադիր ենք, մենք ասելու ենք՝ եկեք ընդդիմություն ձեւավորենք Սերժի իշխանությունը փոխենք, տեսնենք ո՞վ կգա»:
«Համոզված չե՞ք, որ դաշնակցականները չեն գալու, Արթուրը չի գալու»,-պարոն Փաշինյանին ասաց զրուցակիցը: «Խի՞ մենակ իրենք, ես համոզված եմ մյուսներն էլ չեն գալու»,-նկատեց Նիկոլ Փաշինյանը՝ հավելելով, որ այդ ժամանակ վերջապես վերջ կդրվեն այն խոսակցություններին, թե ով է ընդդիմություն՝ ով ընդդիմություն չի:
Երբ պարոն Փաշինյանը քաղաքացիներից հետաքրքրվում էր, թե տրամադրությունը ոնց է, պատասխանում էին՝ մեկ ամսից պարզ կլինի:
Կարդացեք նաև
Բակերում պարոն Փաշինյանը նույն տեքստն էր կրկնում. «Հանրապետական կուսակցությունը Սերժ Սարգսյանի գլխավորությամբ երկարատեւ եւ կոռուպցիոն գործունեության արդյունքում Հայաստանը հասցրել է հուսահատության եզրին եւ հիմա ցանկանում է փողի, ընտրակաշառքի, վարչական լծակների միջոցով ավելի խորացնել իր իսկ ստեղծած ճահիճը՝ դրանով իր գործունեությունը բարեհաջող շարունակելու համար: Բայց մենք եկել ենք ձեզ ասելու, որ Սերժ Սարգսյանի եւ հանրապետականի ստեղծած այդ ճահճից ելք կա, եւ դուք կարող եք ապրիլի 2-ին օգտվել այդ հնարավորությունից»:
Բակից բակ անցնելով՝ «Ելք»-ը բաժանում էր նախընտրական բուկլետները: Բակերից մեկում Նիկոլ Փաշինյանը ավտոտնակի վրա քարոզարշավ արեց՝ կրկին կոչ անելով չհուսահատվել եւ քաղաքացիներին ցույց տալով «ճահճից ելքը»:
Բակերից մեկում քաղաքացին Նիկոլ Փաշինյանից հետաքրքրվեց՝ Վարդան Այվազյանը Երանոսի զավոդը ո՞նց քանդեց: «Ելք»-ի թեկնածու Փաշինյանը հարցը վերահասցեագրեց Վարդան Այվազյանին՝ պարոն Այվազյան, քաղաքացին հարցնում է՝ Երանոսի զավոդը ո՞նց քանդեցիք:
Լուսինե ԲՈՒԴԱՂՅԱՆ
Լուսանկարը` Գագիկ Շամշյանի/shamshyan.com
