«Ես հարցազրույց չեմ տալիս»,-Aravot.am-ին ասաց Հայկական վերածնունդ կուսակցության (ՀՎԿ) նախագահ Արթուր Բաղդասարյանը, որը երիտասարդների հետ նախընտրական հանդիպումից հետո արագ հեռացավ դահլիճից:
ՀՎԿ առաջնորդից ուզում էինք պարզել, թե ի՞նչ միջոցների հաշվին է պատրաստվում Հայաստանի անապահով երիտասարդների համար անվճար կրթություն ապահովել, էժան վարկերով ու առանց կանխավճարի երիտասարդ ընտանիքներին բնակարաններ տրամադրել, փող չունեցող, բայց բիզնես գաղափար ունեցողներին էլ գումարով աջակցել:
Այս բոլոր խոստումները պարոն Բաղդասարյանի՝ երիտասարդների հետ հանդիպման ժամանակ հնչեցին: Երիտասարդները, որոնց հիմնական մասը հենց Արթուր Բաղդասարյանին պատկանող Եվրոպական ակադեմիայից էին, ՀՎԿ առաջնորդի ելույթից հետո որեւէ հարց չունեին:
Կարդացեք նաև
«Եթե հարցեր չունեք, ուրեմն ամեն ինչ պարզ է»,-ասաց Արթուր Բաղդասարյանը եւ հեռացավ: Նա երիտասարդների հետ հանդիպման ժամանակ իր խոսքում շեշտը հիմնականում դրել էր երիտասարդներին առնչվող խնդիրների վրա:
«Հազարավոր երիտասարդներ այսօր չեն կարողանում կրթություն ստանալ, չեն կարողանում ուսման վարձերը վճարել: Ամեն տարի 12 միլիարդ դրամ հատկացվում է կրթությանը՝ պետպատվերի համար, սակայն պետպատվերի համակարգն արատավոր է, այն պետք է հիմնովին փոխել եւ այդ գումարներն ուղղել սոցանապահով երիտասարդների կրթությանը, այլ ոչ թե այդ երիտասարդները ռեկտորների դռների մոտ կանգնեն, դիմումներ գրեն»,-ասաց Արթուր Բաղդասարյանը:
ՀՎԿ-ն, ընտրվելու դեպքում, պատրաստվում է բոլոր մարզերում ստեղծել կարիերայի կենտրոններ, որովհետեւ, ըստ Արթուր Բաղդասարյանի, «մարզերի երիտասարդները պարապ-սարապ ման են գալիս, քանի որ աշխատանք չկա», իսկ կարիերայի կենտրոնները կապահովեն աշխատաշուկայի եւ կրթության սերտ կապը: Նրա խոսքերով, պետությունը պարտավոր է աջակցել այն երիտասարդներին, որոնք ունեն բիզնես մտածողություն, բայց չունեն փող: Արթուր Բաղդասարյանն ուսումնասիրել է միջազգային փորձը եւ տեսել, որ մի շարք երկրներում ստեղծված են ինովացիոն ֆոնդեր, որոնք օժանդակում են նոր բիզնեսներին:
Նա նաեւ հիշեցրեց, թե իրենց կուսակցությունը՝ երբեմնի ՕԵԿ-ը, նախորդ խորհրդարանում ինչպիսի ձեռքբերումներ է ունեցել: Օրինակ՝ երրորդ եւ ավել երեխային հատկացվող միանվագ գումարները կամ լավ սովորող երիտասարդներին անվճար կրթություն տրամադրելու օրենքների նախաձեռնությունը:
ՀՎԿ առաջնորդը գտնում է, որ նոր ամուսնացող զույգերին էլ պետք է միանվագ գումարներ հատկացվեն, ինչպես որ Արցախում է: Բացի այդ երիտասարդ ընտանիքներին բնակարանի համար հատկացվող վարկերը պետք է լինեն ցածր տոկոսներով եւ առանց կանխավճարի:
Բանակի խնդիրներից էլ, Արթուր Բաղդասարյանն առանձնացրեց 18 տարեկաններին սահմանին կանգնելու հարցը, նրա համոզմամբ, սահմանները պետք է պահեն, ոչ թե տասնութ տարեկանները, այլ՝ «պրոֆեսիոնալ» զինվորները, որոնց մի մասը արտագաղթելու փոխարեն կարող է նորմալ վարձատրության դիմաց ե՛ւ ընտանիքը պահել ե՛ւ՝ հայրենիքի սահմանները:
Լուսինե ԲՈՒԴԱՂՅԱՆ
