Մարտի 10-ին Իջեւան քաղաքի մշակույթի տանը մեկնարկեց հնդկական կինոյի ցուցադրության վեցօրյակ: Միջոցառմանը մասնակցում էր Հայաստանում Հնդկաստանի դեսպան Յոգեշվար Սանգվանը՝ իր տիկնոջ հետ: Միջոցառումը կազմակերպել էին Հայաստանում Հնդկաստանի դեսպանատունը եւ Իջեւանի «Գալիք» կրթարանը՝ Իջեւանի քաղաքապետարանի աջակցությամբ:
Քաղաքի մշակույթի տան աշխատակից Գայանե Չապուխյանը, ով վարում էր հանդիսությունը, միջոցառմանը լավ էր պատրաստվել: Նա օրվա խորհրդի, հայ-հնդկական դարավոր բարեկամության մասին արտահայտվելու համար բեմ էր բարձրացել հնդկական ազգային տարազով՝ սարիով, Գայանեն ելույթ ունեցավ հինդի լեզվով: Հնդկաստանի դեսպանը դրանից հաճելիորեն զարմացավ, ինչի մասին հայտնեց իր ելույթում: Իջեւանի «Գալիք» կրթարանում 2000 թվականից գործում է հինդի լեզվի ուսուցման խումբ:
Խմբի անդամների մի մասն այդ լեզվի իմացությունը խորացրել է Հնդկաստանում: Այդ խմբի ուսուցչուհի Մանյա Արսենյանը նույնպես վերապատրաստում է անցել Հնդկաստանում: «Գալիք» կրթարանում ուսուցանում են նաեւ հնդկական ազգային պարեր: Միջոցառման ժամանակ հնդկական մենապարով հանդես եկավ կրթարանի հնդկական պարերի պարուսույց Մելինե Մելիքյանը: Նա ելույթ ունեցավ նաեւ կրթարանի պարի խմբի սաների հետ:
Կարդացեք նաև
Ոսկան ՍԱՐԳՍՅԱՆ
