«Նման ուշադրության արժանանալը խոսում է տեսահոլովակի հաջողության մասին: Եթե հանրությունը խոսում է դրա մասին, ուրեմն այն իրականացրել է իր քարոզչական գործառույթը: Մնացյալը մարդու ազատ կամարտահայտությունն է»,-ՀՀԿ նիստի ավարտին այսօր լրագրողների հետ զրույցում ասաց ՀՀԿ խոսնակ, ԱԺ փոխնախագահ Էդուարդ Շարմազանովը:
Ապա` նա մեկնաբանեց «ՕՐՕ» դաշինքի թեկնածու, պաշտպանության նախկին նախարար Սեյրան Օհանյանի՝ վերջերս հնչեցրած հայտարարությունը, թե «ՀՀ-ում քաղբանտարկյալներ կան». «Իր խղճին եմ թողնում, իր որոշելիքն է: Մինչեւ պաշտոնանկությունը նրա կողմից չեմ լսել հրապարակային հայտարարություն կամ ակնարկ, որ ՀՀ-ում կան քաղբանտարկյալներ: Իր պաշտոնանկությունից հետո էլ, կարծես թե, նոր դատապարտյալներ չունենք»:
Շարմազանովն անդրադարձավ նաեւ Օհանյանի այսօրվա հայտարարությանը, որ ՀՀ-ին պետք են կտրուկ եւ կոշտ փոփոխություններ, ինչպիսիք իրականացրեց Սաակաշվիլին. «Նայած՝ ո՞վ եւ ի՞նչ է հասկանում «Սաակաշվիլու փոփոխություններ» ասելով: Եթե փոփոխություններն Աբխազիան եւ Հարավային Օսեթիան կորցնելն էր, ապա նման փոփոխություններ ես չեմ ուզում: Եթե կոռուպցիայի դեմ պայքարն է, լայնամասշտաբ փոփոխությունները, մենք էլ պատրաստ ենք դասեր քաղել թերություններից եւ առաջ գնալ»:
Լրագրողի նկատառմանը, թե վարչապետ Կարեն Կարապետյանն ու ՊՆ Վիգեն Սարգսյանը խուսափում են լրագրողների հետ զրույցներից, ՀՀԿ խոսնակն այսպես արձագանքեց. «ՀՀԿ ղեկավար կազմի որեւէ ներկայացուցիչ չի խուսափում հարցուպատասխանից: Վարչապետն առայժմ իր հանդիպումներն անցկացնում է ժողովրդի հետ ինտերակտիվ շփումներով»:
Կարդացեք նաև
Ինչ վերաբերում է Սերժ Սարգսյանին, Շարմազանովի փոխանցմամբ՝ նախագահն առաջիկայում օրենքով սահմանված կարգով իր ուղերձները կհաղորդի հանրությանը:
ԿԸՀ-ի կողմից Գագիկ Ծառուկյանին ուղղված զգուշացումներին էլ Էդուարդ Շարմազանովը գնահատական չտվեց:
Լուիզա ՍՈՒՔԻԱՍՅԱՆ
