Այսօր Կոտայքի մարզում ՕՐՕ դաշինքի քարոզարշավն էր: Հանրահավաքի վայրից քիչ այն կողմ տեղադրված էր ՀՀԿ պատգամավոր Վարդան Այվազյանի գովազդային մեծ ցուցապաստառը: Ինչպես հայտնի է, Այվազյանը 1995-1996-ին եղել է Չարենցավանի քաղաքային խորհրդի նախագահ, 1996-1999-ին` Չարենցավանի քաղաքապետ:
Հիմա էլ ՀՀԿ-ի կողմից ռեյտինգային համակարգով նա առաջադրվել է Կոտայքի մարզում: Չարենցավանցիները վստահեցնում էին, որ Այվազյանն իրենց մոտ ձայն չունի, ոչ մի լավ բան նրանից չեն տեսել. «Սաղ Չարենցավանն ինքն ա կերել»:
1991-1995-ին Վարդան Այվազյանը եղել է Չարենցավանի հացի գործարանի տնօրեն: Չարենցավանցիները բողոքում էին, որ այդ ժամանակ սկի հաց էլ չէին կարողանում իրենից առնել: Մեկ ուրիշ չարենցավանցի էլ բորբոքվեց, թե զարմանալի է՝ ինչի՞ համար են նրանք ընտրվել «դեպուտատ».
«Ընտրում ենք, որ գաս մի անգամ ժողով անես, հավաք անես: Նրանք սկի մեզ բարեւ էլ չեն տալիս: Ամեն մեկն իր համար է: Ի՞նչ են արել ժողովրդի համար: ՀՀԿ-ն ի՞նչ է արել, թոշակս էլ է կտրել, թոշակ էլ չի տալիս մեզ: Ամենքն իր ջեբի համար է, կիր ջիպի համար: Դեպուտատ ո՞վ է ճանաչում՝, դեպուտատն ո՞վ է: Գալիս են, 5 տարին մեկ տարածքներ են վերցնում, մի քանի հոգով ման են գալիս, թե դեպուտատ ենք դառնում: Ում է պետք էդ դեպուտատը, մենք առանց դեպուտատի էլ ենք ապրում, մեզ դեպուտատ պետք չի»:
Կարդացեք նաև
Նա հույս ուներ, որ գոնե ՕՐՕ դաշինքը իրենց հարցերը կլուծի, իսկ մյուսները, նրա խոսքերով՝ «միայն իրենց ջեբերն են ուռացնում»:
Բնակիչներից մեկի խոսքերով՝ «Զինվորի տեղը չգիտեն մինչեւ նրա 18 տարեկանը լրանալը: Հենց 18-ը լրանում է՝ ձեռքը դնում են վրան: Գնաց բանակ, եկավ, էլի խաբար չեն ունենում նրանից՝ աշխատում է, չի աշխատում: Չարենցավանում ի՞նչ աշխատանք կա, ոչ մի բան»:
Մենք հիշեցրինք, որ ՕՐՕ դաշինքը խոստանում է, որ 18 տարեկաններին առաջնագիծ չի տանելու՝ նա արձագանքեց՝ շատերն են լավ-լավ խոսքեր տվել, բայց գնում են ու մոռանում են:
Չարենցավանցիներից մեկին հետաքրքրում էր, թե ինչու են Սեյրան Օհանյանին ազատել ՊՆ նախարարի պաշտոնից: Մեր դիտարկմանը, որ հավերժ չէր պաշտոնավարելու՝ նա արձագանքեց. «Ինչի Սերժ Սարգսյանը հավե՞րժ է, որ հավերժ ինքն է: Որ մի մարդ բանակ էլ չի գնացել, նրան բերել է ՊՆ նախարար, իսկ էն մարդը, որը ռազմական սովորած, կրթություն ունի՝ նրան հանել է: Ինչի՞ համար»:
Մեր հարցին՝ Սեյրան Օհանյանի մեղքը ինչո՞ւմ է, որ իրեն ազատել են՝ նա պատասխանեց. «Մեղքը գիտեք որն է, որ գեներալներին թողել է՝ քառօրյա պատերազմում տանկի մեջը սալյարկայի փոխարեն ջուր են լցրել»:
Հռիփսիմե ՋԵԲԵՋՅԱՆ
Հարգելի՛ քաղաքացի,եթե դուք կամ ձեր հարազատը չի մասնակցելու 2017 թ․ ապրիլի 2-ի ԱԺ ընտրությանը,կատարեք նշում դրա մասին
https://citizenobserver.am/hy/elections/register համակարգում՝ նպաստելով նրա փոխարեն կատարված քվեարկության բացահայտմանը։
Ընտրացուցակներում Ձեր անունը կա թե ոչ կարող եք ճշտել հետևյալ՝ կայքում https://www.elections.am/votersreg/
Մեկ ընտրողի քվեի կեղծումով պետությանը (քաղաքացիներին) պատճառվում է 10 000 դոլարի նյութական,մարդկային կյանքերի և
տարածքների կորուստ։