«Ծառուկյան» դաշինքն առաջարկում է 15 առաջնահերթ կետեր, որոնք հնարավորություն կտան կարճ ժամկետում որոշ չափով կարգավորել հասարակության բարեկեցության հետ կապված խնդիրները
«Մեր կարծիքով՝ այսօր վարվող տնտեսական քաղաքականության արդյունքում Հայաստանում ձեւավորվել է վստահության ճգնաժամ»,- մարտի 10-ին Կոնրադ Ադենաուեր հիմնադրամի՝ խորհրդարանական ընտրություններից առաջ կազմակերպած միջոցառման ընթացքում ասաց Ծառուկյան դաշինքի ներկայացուցիչ Մեսրոպ Առաքելյանը:
Նա նշեց, որ «Ծառուկյան» դաշինքն առաջարկում է 15 առաջնահերթ կետեր, որոնք հնարավորություն կտան կարճ ժամկետում որոշ չափով կարգավորել հասարակության բարեկեցության հետ կապված խնդիրները. «Մասնավորապես՝ առաջարկում ենք կենսաթոշակների եւ նվազագույն աշխատավարձերի բարձրացում, էլեկտրաէներգիայի եւ գազի սակագների նվազում: Փոքր բիզնեսի համար երեք տարի հարկային արտոնությունների տրամադրում՝ բոլոր հարկատեսակների գծով: Վերջին տարիներին կուտակված 60 միլիարդ արտահարկային տույժերի ամբողջությամբ համաներում: Նշված ծրագրերը չափելի են, առարկայական եւ կարճ ժամկետում իրականացվող»:
Մեսրոպ Առաքելյանի խոսքերով՝ այս տարվա ընթացքում հնարավոր է որոշակի բարեկեցության ապահովում, ինչը տնտեսությունում որոշակի աշխուժություն նկատելու հնարավորություն կտա. «Տնտեսական ծրագրի շրջանակներում մենք վստահ ենք, որ ընտրություններում հաջողության հասնելուց հետո ձեւավորվելիք քաղաքական թիմը կունենա քաղաքական այնպիսի կամք, որի աշխատանքի արդյունքում կձեւավորվի վստահության այնպիսի մթնոլորտ, որ սկսած հասարակ սպառողից, որ այսօր հետաձգում է իր ծախսերը, քանի որ ամբողջ երկրում տիրում է բացասական սպասումների մթնոլորտ, ինչպես նաեւ խոշոր ներդրողները հնարավորություն կունենան Հայաստանում ակտիվորեն զբաղվել բիզնեսով: Եվ մենք ակնկալում ենք տարեկան նվազագույնը 6 տոկոս ՀՆԱ աճ»:
Կարդացեք նաև
Ամի ՉԻՉԱԿՅԱՆ
