Այսօր Նոր Հաճնում ՕՐՕ դաշինքի քարոզարշավի ժամանակ մի պապիկ մոտեցավ Վարդան Օսկանյանին եւ բողոքեց աշխատանքի եւ սոցիալական հարցերի նախարարից՝ ասելով. «Երկաթե վարագույրներ են, չենք կարողանում մտնել, մեր հարցը ասել»:
Հաճնցիները դաշինքի անդամներին ասում էին՝ «Ասենք՝ ընտրեցինք, բայց դուք էլ գիտեք, որ ինչքան ուզենան, այդքան էլ կխփեն»:
Սեյրան Օհանյանին հաճնցիները հիմնականում ղարաբաղյան խնդրից էին հարցնում, ապրիլյան պատերազմից:
«Ընկեր Օհանյան, մենք քեզ հետ ուզում ենք խոսանք, մենք քեզ տելեվիզորով շատ ենք տեսել, շատ ենք հավանել: Հիմի դեպուտատ ենք ընտրում, մենք քանի տարի դեպուտատ ենք ընտրել, ոչ մեկի երես չենք տեսել»,- այսպես նոր հաճնցիներից մեկը՝ մի տատիկ մոտեցավ Սեյրան Օհանյանին:
Կարդացեք նաև
Նա ի պատասխան վստահեցրեց. «Ընտրեք մեզ, ես պարտավորվում եմ»: Երբ կողքից խանգարում էին, բողոքող տատիկը բարկացավ, թե «թողեք մի բառ խոսեմ էս ջահելի հետ»: Տատիկին անհանգստացնում էր, թե թոշակով ինչպե՞ս կարող են ապրել:
Սեյրան Օհանյանը պատասխանեց, որ եթե իրենց ընտրեն, իրենք թոշակները բարձրացնելու են եւ ուշադիր են լինելու ժողովրդի նկատմամբ:
Հրազդանում Սեյրան Օհանյանին Բաբկեն Եղիազարյանը դիմեց՝ ասելով, որ որդին զինվորական է եղել, հիմա չի աշխատում եւ սովի է մատնված: Սեյրան Օհանյանը հորդորեց իրեն նամակ գրել եւ խոստացավ, որ մի բան կանի:
Չարենցավանում Սեյրան Օհանյանին հարցրեցին, թե ազատամարտիկների համար ի՞նչ է պատրաստվում անել, հեռանում են երկրից: ՊՆ նախկին նախարարը պատասխանեց, որ նրանց համար հատուկ ծրագիր են մշակել:
Այստեղ նաեւ պարոն Օհանյանին դիմեց 2005-ին բանակում զոհված զինվոր Գոռ Պողոսյանի հայրը՝ Գագիկ Պողոսյանը: Նա դժգոհեց, որ իր տան միակ զավակն է զոհվել ու ինքը որեւէ արտոնությունից չի օգտվում. «Դուք հիմա ամեն ինչ ասում եք, որ կարող ենք անել, բայց դուք նախարար եք եղել»: Սեյրան Օհանյանը ընդհատեց. «Ես արել եմ»: Պողոսյանը դժգոհեց, որ ոչ մի բան էլ չի տեսել. «Ես ինչի՞ վեր կենամ գամ հասնեմ նախարարություն»:
Սեյրան Օհանյանը զարմացավ՝ չի կարող նման բան լինել, որ զոհված զինվորի ծնողները որեւէ արտոնությունից չօգտվեն… «ՀՀ-ում չի եղել մի մարդ, որ դիմի ինձ ու ես չաջակցեմ: Ես խոնարհվում եմ ձեր որդու հիշատակի առջեւ, թոշակ չե՞ք ստանում»: Զինվորի հայրն ասաց, որ 30 հազար թոշակ են ստանում, բայց գիտեն, որ կարող է իր կնոջ հետ գնալ հանգստանալու, որից չի օգտվում: Սեյրան Օհանյանը պատասխանեց, որ պետք է հերթագրվել, հնարավորությունների սահմանում են անում:
Նա էլ զարմացավ՝ «էս 12 տարվա մեջ մի անգամ մեր հերթը չեկա՞վ»: Սեյրան Օհանյանը ընդունեց՝ միգուցե իրենց սխալն էլ կա եւ հորդորեց տվյալներ փոխանցել:
Հռիփսիմե ՋԵԲԵՋՅԱՆ
