Ադրբեջանում մարդու իրավունքների համար պայքարող մարդիկ, ընդդիմադիր լրագրողները և այլախոհները համակարգչային նենգ արշավների զոհ են դառնում, որոնք ուղղված են նրանց անձնական տեղեկատվությունը և մասնավոր նամակագրությունը ձեռք բերելուն: Այս մասին հաղորդում է «Ազատություն» ռադիոկայանի միջազգային ծառայությունը՝ վկայակոչելով Amnesty International միջազգային իրավապաշտպան կազմակերպության մարտի 10-ին հրապարակած զեկույցը:
Հետազոտությունը ցույց է տվել, որ վերջին 13 ամիսներին պարբերաբար կիբերհարձակումներ են իրականացվել Ադրբեջանի կառավարության քննադատների օգտահաշիվների դեմ:
«Մեր հետազոտությունը ցույց է տալիս, որ Ադրբեջանում թիրախավորված և համակարգված կիբերարշավ է իրականացվում քննադատական ձայների նկատմամբ, որոնցից շատերը երկար ժամանակ իշխանության բռնաճնշումների զոհ են եղել»,- ասել է կազմակերպության տեխնոլոգիական հարցերով ավագ փորձագետ Կլաուդիո Գուարնիերին:
Նրա խոսքով՝ վնասակար ծրագրի նպատակն է, որքան հնարավոր է շատ տեղեկատվություն հավաքել թիրախի մասին: «Ուսումնասիրելով թիրախային խմբերի պրոֆիլները՝ դժվար չէ հասկանալ, ինչու են զոհերը կարծում, որ նման հարձակման պատասխանատուները հենց ադրբեջանական իշխանություններն են»,-հավելել է Գուարնիերին:
Կարդացեք նաև
Պատրաստեց՝ Վիկտորյա ԱՆԴՐԵԱՍՅԱՆԸ
