Ըստ ռուսաստանյան հեղինակավոր կենտրոնի անցկացրած հարցումների արդյունքների, հայաստանցիների շուրջ 78 տոկոսը դժգոհ է երկրում տիրող իրավիճակից, իսկ ամեն երկրորդի (հարցվածների շուրջ 51 տոկոսի) կարծիքով, իրավիճակը վատացել է հատկապես վերջին տարիներին։
Հայաստանցիների գերակշիռ մասը՝ շուրջ 72 տոկոսը մտադիր են մասնակցել խորհրդարանական ընտրություններին: Նման եզրակացության են հանգել Հասարակական կարծիքի ուսումնասիրության համառուսաստանյան կենտրոնի (ВЦИОМ) փորձագետները՝ անցկացրած հարցման արդյունքում։
«Ինտերֆաքս»-ի փոխանցմամբ, ռուսաստանյան սոցիոլոգները Հայաստանում արձանագրել են ներկա վիճակից դժգոհ մարդկանց բավական բարձր ցուցանիշ, այսպես՝ հարցվածների շուրջ 78 տոկոսը դժգոհ է երկրում տիրող իրավիճակից, իսկ ամեն երկրորդը (հարցվածների շուրջ 51 տոկոսը) ասել է, որ իրավիճակը վատացել է հատկապես վերջին տարիներին։
Հայաստանցիներն ամենից շատ դժգոհել են գործազրկությունից․ հարցվածների շուրջ 45 տոկոսի կարծիքով, աշխատանք գտնելը շատ դժվար է, 22 տոկոսը բողոքել է ճանապարհներից, 13 տոկոսն էլ՝ աղքատությունից։ Ուշագրավ է այն, որ նշված ցուցանիշներով հանդերձ, ըստ ռուսաստանյան կենտրոնի ուսումնասիրության արդյունքների, Կարեն Կարապետյանի ղեկավարած կառավարության գործունեությունը դրական է գնահատել Հայաստանում հարցվածների շուրջ 77 տոկոսը, բացասական են գնահատել միայն 12 տոկոսը։
Կարդացեք նաև
Ռուսաստանցի սոցիոլոգները նաև պարզել են, որ Հայաստանի բնակչության զգալի հատվածը՝ շուրջ 71 տոկոսը, ուշադրությամբ հետևում է նախընտրական քարոզարշավին: Հարցումն անցկացվել է 1600 հայաստանցիների շրջանում, հանրապետության տարբեր բնակավայրերում, փետրվարի 22 – 26-ը։
ВЦИОМ-ի տվյալներով, քարոզարշավին մասնակցող քաղաքական ուժերի շրջանում ներկայումս ամենաբարձր վարկանիշն ունի «Ծառուկյան դաշինքը»՝ շուրջ 26 տոկոս, իսկ երկրորդ հորիզոնականում ՀՀԿ-ն է՝ 19 տոկոսով: «Ինտերֆաքս»-ը, սակայն, նկատում է՝ չնայած հանգամանքին, որ այս հարցման անցկացման պահին «Ծառուկյան դաշինքի» վարկանիշը 7 կետով ավելի բարձր էր ՀՀԿ-ի վարկանիշից, այդուհանդերձ, ռեյտինգային կարգով ընտրությունների պարագայում այս երկու քաղաքական ուժերի վարկանիշները գրեթե հավասարվում են, «Ծառուկյան դաշինք»՝ 25 տոկոս, ՀՀԿ՝ 23 տոկոս:
Նույն ուսումնասիրության արդյունքներով, դաշինքների համար սահմանված 7 տոկոսանոց, իսկ կուսակցությունների համար՝ 5 տոկոսանոց շեմը հաղթահարելու շանս ունի ևս երկու ուժ՝ «Ելք» դաշինքն ու «Հայկական վերածնունդ» կուսակցությունը։
Նյութի մանրամասները կարդացեք «Ազատություն» ռադիոկայանի կայքում
