Թե խորհրդարանական ընտրություններում ՀՅԴ-ն քա՞նի տոկոս ձայն կհավաքի, այսօր կառավարության նիստից հետո լրագրողների հետ զրույցում ՀՅԴ անդամ, բնապահպանության նախարար Արծվիկ Մինասյանն ասաց, որ այդ հարցին չի ցանկանում պատասխանել կառավարության ներսում: Ասաց, որ երկուշաբթի օրվանից արձակուրդում կլինի եւ «մեծ սիրով» կպատասխանի բոլոր հարցերին:
Պարոն Մինասյանից նաեւ հետաքրքրվեցին, թե սահմանադրական փոփոխություններին կողմ արտահայտվող ՀՅԴ-ն կանխատեսո՞ւմ էր, որ ռեյտինգային ընտրակարգն այսպիսի խառնաշփոթ կառաջացնի եւ կվերածվի թաղային հեղինակությունների պայքարի: Նախարարն ասաց. «Դուք դարձյալ փորձում եք չհիշել ՀՅԴ պնդումներն ու առաջարկները: Ռեյտինգային քվեարկությանը մենք առաջին հերթին կողմ ենք եղել ամբողջ հանրապետությունով մեկ քվեարկվող թեկնածուների համար: Տարածքային ցուցակներով առաջադրումը եղել է այն կոմպրոմիսը, որպեսզի կառավարման խորհրդարանական համակարգը եւ համամասնական համակարգը դրվի»: Ըստ Արծվիկ Մինասյանի, անշուշտ հնարավոր է, որ ընթացքում առաջանան որոշակի դժվարություններ, խնդիրներ՝ տարածքային ցուցակներում քվեարկության անձնավորման հետ կապված. «Բայց բոլորը պետք է գիտակցեն, որ անձին ընտրելով՝ ընտրում ենք այն քաղաքական ուժին, որը պետք է ձեւավորի իշխանություն, կամ որը պետք է ներկայացված լինի պառլամենտում: Իսկ պառլամենտն այն միակ ու բարձրագույն մարմինն է, որն իրականացնում է երկրի 5 տարիների կառավարումը»:
Ընտրակաշառքների մասին էլ պարոն Մինասյանը խոսակցություններ է լսել, բայց կոնկրետ փաստեր եւ ապացույցներ չունի, որպեսզի կաշառք բաժանող ուժի անուն տա:
Լուսինե ԲՈՒԴԱՂՅԱՆ
