Ինչպես արդեն տեղեկացրել ենք, «Հայկական վերածնունդ» կուսակցությունը Արագածոտնի մարզում է: Կուսակցության առաջնորդ Արթուր Բաղդասարյանը հանդիպում ունեցավ նաեւ Ապարան քաղաքի բնակիչների հետ:
Արթուր Բաղդասարյանը նշեց, որ իրենց ցանկությունն է, որ մարդիկ ընտրեն ջիգյարով, սրտով, ոչ թե մի քանի հազար դրամով: Արթուր Բաղդասարյանը հետաքրքրվեց, թե ներկաներից ովքեր են գոհ իրենց կյանքից, ոչ ոք ձեռք չբարձրացրեց, մյուս հարցին, թե ովքեր են դժգոհ, բոլոր ներկաները բարձրացրեցին իրենց ձեռքերը. «Ես ուզում եմ մեր ժողովուրդը հավատով քվեարկի: Ես չեմ ուզում ոչ մեկին քննադատել, միայն քվեարկեք նրան, ում հավատում եք, ով ձեր մատից փուշ է հանում»:
Արթուր Բաղդասարյանը հորդորեց ներկաներին պատասխանատվությունը իրենց վրայից չգցել եւ գաղափարով ընտրություն կատարել. «Մենք ասում ենք երեսուն քայլ, որ կփոխի Հայաստանը, երեսուն նպատակ, որը կապահովի վերածնունդ եւ ապահովություն մեր հայրենիքին: Եվ դրանք օդից չենք վերցրել, դրանց փորձառությունն ենք ունեցել: Պետք է հասկանաք, որ ապրիլի 2-ից հետո մեկ էլ ընտրություն կլինի հինգ տարի հետո, այդ քվեի արժեքը պետք է իմանաք»:
Ամի ՉԻՉԱԿՅԱՆ
