«Միշա, ընտրությունից հետո, ապրիլի 3-ին կգաս մի հատ գյուղտեխնիկա, իմ կողմից կստանաս նվեր: Բայց ընտրություններից հետո, որ ընտրությունները կապ չունենան»,- այսօր Արմավիրի մարզի Արմավիր քաղաքում հավաքվածներից մեկին ասաց «Ծառուկյան» դաշինքի առաջնորդ Գագիկ Ծառուկյանը: Միշան Գագիկ Ծառուկյանին դիմել էր գյուղատնտեսական խնդիրներին վերաբերող հարցով:
Ծառուկյանին այստեղ դիմեցին նաեւ համայնքներից մեկի դպրոցի, տարբեր առողջական եւ անձնական խնդիրներով: Գագիկ Ծառուկյանն ասաց, որ բոլոր հարցերով ինքը կզբաղվի միայն ապրիլի 2-ից հետո:
Հիշեցնենք, երեկ ԿԸՀ նախագահ Տիգրան Մուկուչյանը հայտարարել էր, որ «Ծառուկյան» դաշինքի ղեկավարը օրենք է խախտում՝ նախընտրական փուլում խոստումներ տալով, դրամական եւ այլ տեսակի օգնություններ տրամադրելով:
Արմավիրի մարզկենտրոնում նաեւ գլոբալ հարցերով դիմեցին դաշինքի առաջնորդին: Ներկաներից մեկին, օրինակ, մտահոգում էր Հայաստանից հեռացած այն երիտասարդների ճակատագիրը, ովքեր հիմա ցանկանում են, բայց չեն կարող վերադառնալ հայրենիք, քանի որ կարող են դատապարտվել որպես դասալիքներ: Ծառուկյանն ասաց, որ իր կարծիքով՝ համապատասխան օրենսդրությամբ համաներում պետք է հայտարարվի այդ մարդկանց նկատմամբ, ովքեր ցանկանում են, թող վերադառնան:
Կարդացեք նաև
Ներկայացնելով դաշինքի առաջնահերթություն հռչակած 15 կետերն էլ, Գագիկ Ծառուկյանն այստեղ խոսեց հիմնականում գյուղատնտեսությունից, 2-5% վարկավորումից, մանր եւ միջին բիզնեսը հարկերից ազատելուց, նաեւ ասաց, որ եթե խելոք լինենք՝ մեր գյուղատնտեսական արտադրանքը կարող ենք արտահանել Արաբական Էմիրություններ:
Հավաքվածներից մեկն էլ, մինչ բեմահարթակ բարձրանալը Գագիկ Ծառուկյանին հորդորեց` էլ հետ չկանգնես: Արդեն բեմահարթակին Ծառուկյանն անդրադարձավ 2015-ի իրադարձություններին. «Ես հետ չեմ կանգնել, ժողովուրդ ջան, 2015 թվականին արյուն կարող էր թափվել, ես ասացի, որ պատրաստ եմ պատասխան տալու` թող գան, ստուգեն, ես մեղքի տակ չմտա, որ ժողովրդի մատը փուշ չմտնի»:
Նրա խոսքով` այսօր ընտրություն է, դա արդեն հեղափոխություն չի և ինքը գալիս է երկրում իրավիճակ փոխելու, քանի որ վստահ է` այսպես ապրել այլևս անհնար է. «Ոչ մեկին մի լսեք` ծանոթ, բարեկամ, բոլոր նրանց, ովքեր ուզում են իրենց պաշտոնին մնալ, այլ հավատացեք այն կառույցին, որ իր կյանքում գործ է արել: Գնացեք ընտրության ու Ձեր ձայնը տվեք այն կառույցին, որին հավատում եք, իսկ եթե չանեք` մեղավորը դուք եք, ուրիշից չպահանջեք» :
Այլ մանրամասներ՝ տեսանյութում:
Նելլի ԳՐԻԳՈՐՅԱՆ
