Ազգային անվտանգության հարցերով ԱՄՆ նախագահ Դոնալդ Թրամփի նախկին օգնական Մայքլ Ֆլինը, որը հայտնվել էր սկանդալի կենտրոնում Ռուսաստանի հետ գաղտնի կապեր ունենալու համար, գրանցվել է արդարադատության նախարարությունում՝ որպես Թուրքիայի կառավարության լոբբիստ, հաղորդում է Associated Press գործակալությունը:
Ֆլինը Թուրքիայի շահերից բխող լոբբիստական գործունեությունը դադարեցրել էր նախագահական ընտրություններից առաջ, իսկ պետության ղեկավարի պաշտոնում Դոնալդ Թրամփի ընտրվելուց հետո պարտավորվել էր չգործել արտասահմանյան իշխանությունների շահերի օգտին:
Գործակալության տվյալներով՝ երեքշաբթի Ֆլինի փաստաբանը նախարարություն է ուղարկել համապատասխան փաստաթղթեր, որոնց համաձայն նա ինքնակամ գրանցվում է լոբբիստական գործունեության համար, որը, ընդհանուր առմամբ, կարող է շահավետ լինել Թուրքիայի կառավարության համար:
Ավելի վաղ Ֆլինի քոնսալթինգային ընկերությունը ԱՄՆ Կոնգրեսին տեղեկացրել էր Նիդեռլանդներում թուրք գործարարին պատկանող ընկերության հետ համագործակցության մասին: Սակայն այդ ժամանակ Ֆլինը փաստաթղթեր չի ներկայացրել արդարադատության նախարարություն: Փաստաթղթերում նաև նշվում է, որ այդ համագործակցությունը դադարեցվել է 2016թ.նոյեմբերին:
Կարդացեք նաև
Հիշեցնենք, որ Ֆլինը հրաժարական է տվել փետրվարին՝ խոստովանելով, որ ոչ լիարժեք տեղեկատվություն է տրամադրել ռուս դեսպան Սերգեյ Կիսլյակի հետ շփումների մասին և ներողություն է խնդրել Դոնալդ Թրամփից:
Պատրաստեց՝ Վիկտորյա ԱՆԴՐԵԱՍՅԱՆԸ
