«Մեր երկրում մարդկային հարաբերությունները նուրբ չեն, կոպիտ են: Միմյանց անձնական տարածությունը հարգել, սխալն ընդունել չգիտենք, զիջել չենք սիրում, պահանջկոտ ենք, տղամարդիկ կնամեծար չեն: Այն աստիճան, որ երբ մեկն ինձ համար դուռ է բացում, քիչ է մնում գրկեմ»,- ասաց երգչուհի, երգահան Լիլիթ Պիպոյանը մարտի 8-ին «Հոդված 3» ակումբում տեղի ունեցած «ԾիւսUP” կանանց զրույցների պարբերաշարքի շրջանակներում տեղի ունեցած հանդիպման ժամանակ:
Լիլիթ Պիպոյանը խոսեց նաև ազգային արժեքների մասին, շեշտելով, որ լավ կլիներ դրան զուգահեռ տարածվեին նաև համամարդկային արժեքները: «Հարկ է պրոպագանդել, որ ազնվությունը, հավատարմությունը կարևոր են, որ աշխատելը պատվաբեր է և այլն»,- ասաց նա:
Անդրադառնալով կանանց համաշխարհային տոնին՝ մարտի 8-ին, երգչուհին ասաց. «Կանայք և տղամարդիկ հավասար են: Պետք է գիտակցել, որ կանայք էլ կարող են իրենց կարծիքն ունենալ ու արտահայտել այն: Կանայք լավ էլ հանճարներ են»:
Մելանի ՍԱՐԳՍՅԱՆ
