Aravot.am կայքում այսօր՝ մարտի 7-ին հրապարակված հոդվածում եւ տեսանյութում «Ծառուկյան» դաշինքի Չինչին գյուղի պատասխանատուն Բերդ քաղաքում Գագիկ Ծառուկյանին բողոքել է, որ Ծառուկյանին սատարելու համար իր ամուսնուն զանգահարել են Տավուշի մարզի գազի սպասարկման ծառայությունից եւ ասել, որ նա աշխատանքից ազատման դիմում գրի:
Զանգահարեցինք «Գազպրոմ Արմենիա» ընկերության Տավուշի մարզի գազաֆիկացման եւ գազաբաշխման մասնաճյուղի տնօրեն Սեյրան Խառատյանին եւ հարցրինք՝ ինչո՞ւ են մարդուն հրահանգել աշխատանքից ազատվելու դիմում գրել:
Ս. Խառատյանն ասաց, որ ինքը սրտի հետ կախված լուրջ խնդիրների պատճառով 2 օր Երեւանում բուժվում է: Նա հայտնեց, որ ինքը ՀՀԿ Տավուշի ընտրատարածքային ցուցակի թեկնածու է, այդ պատճառով գտնվում է չվճարվող արձակուրդում: Ասաց, որ մինչ արձակուրդ գնալը իր աշխատանքային կոլեկտիվի անդամներին հայտնել է, որ խորհրդարանական ընտրություններում յուրաքանչյուրը կարող է ունենալ իր կարծիքը, դիրքորոշումը, թեկնածուն:
Ս.Խառատյանը հայտնեց, որ խորհրդարանական ընտրություններում ունեցած դիրքորոշման համար իր հիմնարկում ոչ ոք չի կարող տուժել, աշխատանքից ազատվել: Բերդ քաղաքում հնչած բողոքի կապակցությամբ ասաց. «Մարդիկ կան, ովքեր ցանկանում են իրենց թեկնածուին ժողովրդի մոտ գովազդ անել, բայց, ցավոք, արջի ծառայություն են մատուցում»:
Կարդացեք նաև
Ս. Խառատյանը հայտարարեց, որ ընտրությունների հետ կապված իր ղեկավարած հիմնարկությունում ոչ մեկը աշխատանքից չի ազատվել եւ չի ազատվելու, գործից կազատվեն միայն գործի նկատմամբ անբարեխիղճ աշխատողները:
Խառատյանը հավելեց, որ, օրինակ, ՀՅԴ Տավուշի մարզի ընտրատարածքային ցուցակի թեկնածու Շողիկ Աղաջանյանի մայրը գազի ծառայության հսկիչ է, սակայն իրենք նրա թեկնածության առաջադրումը բնական են համարում, ոչ մի խոչընդոտ չեն տեսնում:
Ոսկան ՍԱՐԳՍՅԱՆ
Լուսանկարը՝ Ս. Խառատյանի ֆեյսբուքյան էջից
