Կոտայքի մարզում շարունակվում է «Կոնգրես-ՀԺԿ» դաշինքի նախընտրական քարոզարշավը: Չարենցավան քաղաքում ՀԱԿ ակտիվի հետ հանդիպմանը եւս ներկայացվեց դաշինքի՝ Արցախյան հակամարտության լուծման «խաղաղության ծրագիրը», ասել է թե՝ փոխզիջումների վրա հիմնված «Մադրիդյան սկզբունքները»:
Դաշինքի թեկնածու, ՀԱԿ փոխնախագահ Լեւոն Զուրաբյանն ընդգծեց՝ Չարենցավանը ժամանակին հայտնի էր արդյունաբերական հզոր ներուժով, որից այսօր ոչինչ չի մնացել: Այդ ամենի, եւ առհասարակ՝ ՀՀ-ի զարգացման համար ՀՀ-ն պետք է հասնի խաղաղության, լուծի Արցախյան հակամարտության հարցը, որպեսզի դուրս գա շրջափակումից:
«ՀՀ-ն մրցունակ չէ միջազգային ասպարեզում, երկու կողմից շրջափակված է Թուրքիայով եւ Ադրբեջանով»,-ասաց Զուրաբյանը:
Կարդացեք նաև
Չարենցավանցիներն անվստահություն հայտնեցին. տարեցներից մեկն ասաց. «Մըր պապերը մըր համար սարքել էին 12 գործարան, բայց դուք քանդեցիք»: Կողքին կանգնած տղամարդն էլ ուղղեց. «ինքը չի քանդել, արա՜…»: Տարեցը շարունակեց. «Լավ, մըր հորեղբոր տղերքը քանդեցին…»:
Դաշինքի «խաղաղության ծրագրի» ներկայացման ժամանակ փոխզիջումների առնչությամբ մեկ այլ պապիկ էլ անհամաձայնություն հայտնեց, թե «հողը պահել է պետք»:
Լեւոն Զուրաբյանն էլ հակադարձեց՝ ասելով, որ իրենց ծրագիրը հենց հողը պահելու ծրագիրն է. «Մենք Ղարաբաղն ազատագրել ենք, բայց այն պահպանո՞ւմ ենք…մեր կարծիքով՝ այսպես չենք պահպանում, այլ կորցնում ենք: Եթե ուզում ենք հողը պահպանենք, պետք է արագ գնալ խաղաղության պայմանագրին: Քանի դեռ փխրուն զինադադարի վիճակ է, հողը վերջնական ազատագրված չէ»:
Մանրամասն՝ տեսանյութում
Լուիզա ՍՈՒՔԻԱՍՅԱՆ
