Հարցազրույց Արարատի մարզում ռեյտինգային
ընտրակարգով ՀԱԿ-ի կողմից առաջադրված Վարդան Բեյլերյանի հետ
– Ինչո՞ւ եք որոշել պատգամավոր դառնալ:
– ՀԱԿ-ը ինձ համար հարազատ կուսակցություն է, եւ ես ընդունել եմ ՀԱԿ-ի՝ ՀՀ Ազգային ժողովի պատգամավորի ռեյտինգային ընտրակարգով Արարատի մարզում թեկնածու առաջադրվելու առաջարկը:
Սակայն չեմ թաքցնում, որ իմ միակ նպատակը պատգամավոր դառնալը չէր: Լինելով հայրենադարձ՝ ցանկանում եմ բարձրաձայնել Սփյուռք-Հայաստան կապերի մասին իմ պատկերացումները, ներկայացնել մեր ժողովրդին հուզող հարցերի ու խնդիրների լուծումների իմ տեսլականը: Սփյուռքի մեր հայրենակիցները պետք է ներգրավված լինեն Հայաստանի զարգացման գործընթացներում: Հայաստանում պետք է համոզիչ պայմաններ ստեղծել, որպեսզի Սփյուռքի մեր հայրենակիցները ներդրումներ կատարեն Հայաստանում: Վերջապես, կարծում եմ, որ պետական մակարդակով սփյուռքահայերի ներգաղթ պետք է կազմակերպել դեպի Հայաստան` ամեն պայման ստեղծելով, որպեսզի սփյուռքահայերն ամրապնդվեն հայրենիքում: Հայաստանի կառավարությունը նաեւ պատշաճ աջակություն պետք է ցուցաբերի այստեղ բնակություն հաստատած սփյուռքահայերին:
Կարդացեք նաև
– ՀԱԿ-ը Ձեզ առաջադրել է ռեյտինգային ընտրակարգով Արարատի մարզում: Այդտեղ բավական թեժ պայքար է սպասվում. ՀՀԿ-ն եւ ԲՀԿ-ն թեժ պայքար են մտնելու` նախկին վարչապետ Հովիկ Աբրահամյանն իր թիմակիցներով պայքարելու է «Ծառուկյան» դաշինքին ձայներ ապահովելու համար` ընդդեմ նախկին կուսակիցներ Արայիկ եւ Արամայիս Գրիգորյանների: Այստեղ մեծ ազդեցություն ունի նաեւ նախկին ոստիկանապետ Ալիկ Սարգսյանը, որը եւս ՀՀԿ-ի օգտին է աշխատելու: Ինչպե՞ս եք պայքարելու նրանց դեմ:
– Առաջադրվելով Արարատի մարզում՝ մեր թիմը եւ ես տեղյակ էինք, որ այստեղ թեժ պայքար է գնալու: Բայց, իմ կարծիքով, այսօր երկրում տիրող իրավիճակում պատասխանատու են նաեւ ձեր կողմից նշված անձինք ու քաղաքական ուժերը: Նրանք փող են դրել, այդ փողին համարժեք ձայն են փորձելու հավաքել: Մենք խաղաղության ծրագիրն ենք ներկայացրել, եւ ամեն մեկս, ինչքան հնարավոր է, ձայն կբերենք այդ ընդհանուր ծրագիրն իրականացնելու համար:
Մեր խնդիրն է լինելու ընտրողին ճիշտ ու շիտակ ներկայացնել իրավիճակը եւ քարոզարշավի ժամանակ մարդկանց հասցնել այդ գաղափարները, այդ թվում նաեւ՝ արդի սոցիալական խնդիրների լուծման մեր ծրագրերը:
– ՀԱԿ-ը չունի նախկին հեղինակությունն ու ժողովրդականությունը. սա Ձեզ չի՞ կաշկանդում, ինչպե՞ս պետք է ընտրողին համոզեք:
– 2008 թվականը ՀԱԿ-ի հեղինակության գագաթնակետն էր: Մարտի 1-ի սպանդից հետո ՀԱԿ-ի մոտ 150 ամենաակտիվ գործիչներին լցրեցին բանտերը եւ ճնշումներ կիրառեցին մոտ 1000 ակտիվիստների նկատմամբ: Չնայած դրան՝ շարժումը 2008թ.-ից հետո էլ եւ վերելքներ է ունեցել, եւ վայրէջքներ: Բայց քանի որ Հայաստանում 2012 եւ 2013 թվականների ընտրությունները նույնպես կեղծվել են, ուստի չենք կարող կուսակցությունների հեղինակությունների մասին իրական պատկերը ունենալ: Չենք կարող հիմք ընդունել նաեւ սոցիոլոգիական հարցումների արդյունքները:
ՀԱԿ-ի ժողովրդականությունը նվազեց, որովհետեւ չհաջողվեց իշխանափոխություն անել: Այսինքն՝ ՀԱԿ-ը չկարողացավ ռեժիմը հեռացնել: Չնայած դրան՝ անցած տարիների ընթացքում մեր երկրում քաղաքական օրակարգ ձեւավորել, մարտահրավերներին գնահատական եւ լուծումներ առաջարկել է միայն ՀԱԿ-ը: Այս 9 տարիների ընթացքում ՀԱԿ-ը ճանապարհներ է որոնել եւ այժմ էլ որպես Հայաստանի զարգացման ճանապարհ ընտրել է «խաղաղության, հաշտության եւ բարիդրացիության» ծրագրի իրականացումը: Նաեւ իմ համոզմունքն է դա, եւ ես իմ ուժերի ներածի չափով կնպաստեմ դրա իրականացմանը:
– Խոսակցություններ կան, որ մարզպետարաններին հանձնարարված է տեղերում ոչ պաշտոնապես աջակցել ՀԱԿ-ի գրասենյակների բացմանը, նախընտրական գործընթացներում ՀԱԿ-ի համար մարդկանց ներգրավել, ֆինանսավորել: Այդ գործընթացների վերահսկողությունն էլ անձամբ մարզպետների վրա է դրված: Դա համապատասխանո՞ւմ է իրականությանը, Դուք Արարատի մարզպետից համապատասխան աջակցություն ստանո՞ւմ եք:
– Դրանք անհեթեթ խոսակցություններ են, ես այդ հարցին չեմ անդրադառնա:
Համենայնդեպս, ինձ նման բան հայտնի չէ:
Զրույցը` ՆԵԼԼԻ ԳՐԻԳՈՐՅԱՆԻ
Հ. Գ.- Հարցազրույցը տեղի է ունեցել նախքան ՀՀ վարչապետ Կարեն Կարապետյանի` սփյուռքահայերին ուղղված կոչը:
«Առավոտ»
03,03.2017
