Ինչպես ավելի վաղ հայտնել էինք, ՀՀ պաշտպանության նախարարությունում այսօր տեղի ունեցավ Զինծառայողների ապահովագրության հիմնադրամի հոգաբարձուների խորհրդի առաջին նիստը:
«Ավելորդ է ես մեկ անգամ շեշտել այն կարեւորությունը, որը տրված է հիմնադրամի թափանցիկության խնդրին: Մեր առաջին խնդիրն է՝ թափանցիկության երաշխավորումն ապագայում»,-վստահեցրեց հիմնադրամի խորհրդի նախագահ ընտրված Պաշտպանության նախարար Վիգեն Սարգսյանը:
Նա տեղեկացրեց, որ հիմնադրամի խորհուրդն արդեն ձեւավորված է եւ շահագրգիռ կողմերին թույլ է տալու հիմնադրամի գործունեության վերահսկողություն իրականացնել:
Նախարարի փոխանցմամբ՝ հիմնադրամի խորհրդի երեք անդամներ ընտրվել են հ/կ-ներից, որոնք ոլորտում փորձ ունեն. «Երեք հոգի նշանակվել են ԿԲ-ի կողմից, ունեն մասնագիտական գիտելիքներ, որոնք թույլ կտան հիմնադրամի գործունեությունն արդյունավետ կազմակերպել: Կառավարության կողմից էլ ներկայացվել եմ ես որպես նախարար եւ ֆինանսների նախարարի տեղակալը»:
Կարդացեք նաև
Նախարարը նշեց, որ մեկ տեղ նախատեսված է նաեւ ընդդիմության համար. «Տեղը թափուր է մինչեւ ապրիլին կայանալիք ընտրությունները: Խորհրդարանի ամենամեծ ընդդիմադիր խմբակցությանը կառաջարկվի նշանակել խորհրդի իրենց ներկայացուցչին: Արդեն իսկ խորհրդակցել ենք խմբակցությունների հետ, ասացին, որ ճիշտ է հարցին անդրադառնալ ընտրություններից հետո»:
Մանրամասն՝ տեսանյութում:
Լուիզա ՍՈՒՔԻԱՍՅԱՆ
