Օրերս կառավարության ղեկավարի գլխավորությամբ Վրաստան պաշտոնական այցի ժամանակ քննարկվել է նաեւ Վերին Լարսին այլընտրանքային ճանապարհներ գտնելու հարցը: Այսօր կառավարության նիստից հետո լրագրողների հետ ճեպազրույցում տրանսպորտի, կապի եւ տեղեկատվական տեխնոլոգիաների նախարար Վահան Մարտիրոսյանը չհստակեցրեց, թե այլընտրանքային ո՞ր ճանապարհի մասին են բանակցել վրացի գործընկերների հետ:
Նախարարն ասաց, որ դեռ կոնկրետ արդյունք չունեն. «Ինչպես վարչապետը հայտարարեց՝ սպասում ենք, այլընտրանք կլինի: Բայց այլընտրանքը չի վերաբերում միայն Աբխազական երկաթգծին կամ Օսիայով ճանապարհին, տարբեր ուղղություններով այլընտրանք կլինի»:
Վահան Մարտիրոսյանի ներկայացմամբ՝ Լարսին այլընտրանքը նաեւ Փոթիի նավահանգստի լաստանավն է: Լրագրողների դիտարկմանը, որ լաստանավը հիմա էլ կա եւ դա, ըստ գործարարների, թանկ է, նախարարը պարզաբանեց. «Արդեն ամիսը 3 անգամ լաստանավային փոխադրումներ են իրականացվում, եւ հայկական կողմը ստացել է մեծ զեղչեր»:
Վրացական կողմի հետ բանակցությունների արդյունքում, ըստ Վահան Մարտիրոսյանի, պայմանավորվածություն է ձեռք բերվել, որ լաստանավային փոխադրումների գները պետք է էլի նվազեցվեն մեր բեռնափոխադրողների համար. «Դրա շուրջ առայժմ մասնավոր «Հարավկովկասյան երկաթուղին» է բանակցել ռուսական ու վրացական կողմերի հետ, արդյունքներ կան: Իսկ Վրաստանի իշխանությունները կարող են միջամտել, որպեսզի ստանանք ինչ-որ զեղչեր»:
Կարդացեք նաև
Նելլի ԲԱԲԱՅԱՆ
