Այստեղ անտարբերութիւնը անբացատրելի է. «Ասպարեզ»

Լուրջ ենք, սակայն ո՛չ այնքան, որ մեր հաւաքական ուժը բազմապատկելու ուղղութեամբ առաւել նպատակասլաց աշխատանք տանինք:

Տեղական ընտրութիւններու շեմին ենք, եւ դարձեա՛լ մեր կազմակերպուածութիւնը, մեր ազդեցութիւնը պիտի չափուին քուէատուփերու մէջ տեղ գտած մեր քուէներուն թիւով:

Այստեղ անտարբերութիւնը անբացատրելի է:

Ի՞նչն է պատճառը, որ քուէարկելու իրաւունք ունեցող մեր ազգակիցներուն մէկ կարեւոր մասը կը դժկամի նեղութիւն քաշել ու իր կարեւոր քուէաթերթիկը նետել քուէատուփին մէջ:

Ի՞նչն է պատճառը, որ բազմաթիւ հայրենակիցներ կը զլանան նուազագոյն ճիգ ու ժամանակ՝ իբրեւ քուէարկող արձանագրուելու, ուռճացնելով հայկական քաղաքական ազդեցութիւնը, կշի՛ռը: Քանի մը րոպէի գործ է արձանագրուիլը, եւ այդ դիւրին աշխատանքը կատարելու համար օգնութեան ձեռք երկարելու պատրաստակամ են Հայ Դատի յանձնախումբի անդամները:

Տարուէ տարի նո՛յն հարցը կը դիմագրաւենք, նո՛յն ափսոսանքը կ՛արձանագրենք, կը յուսահատինք, կը խանդավառուինք, նոր ոգեւորութեամբ դէպի առաջ կ՛ուզենք նայիլ, բայց եւ այնպէս, շօշափելի արդիւնքներու հասնելու գոհունակութիւնը չենք յաջողիր նուաճել:

Ի՞նչ պէտք է ընել: Մարտավարութիւն փոխել, քարոզչական նոր ոճ որդեգրել, մեր խօսքն ու պատգամը թարմացուած, հասկնալի ու մատչելի լեզուով փոխանցել: Այս բոլորը հաւանաբար անհրաժեշտ են: Ամէնէն կարեւորը՝ աշխատանքի իմաստը, անոր օգտակարութեան զգացողութիւնը պէտք է հասու ըլլան թէ՛ քուէատիրոջ, թէ՛ տակաւին քուէարկելու իրաւունքին հանդէպ անտարբերութիւն ցուցաբերողին:

Նյութի մանրամասները կարդացեք «Ասպարեզ»–ի  կայքում