Հարցազրույց ԵԿՄ փոխնախագահ Ղուկաս Ուլիխանյանի հետ
– Դուք մեկ անգամ պատգամավոր եղել եք՝ երկրորդ գումարման ԱԺ-ում՝ 1999-2003թթ. հատվածում: Դրանից հետո գործարարությամբ եք զբաղվում արդեն 14 տարի: Ինչո՞ւ որոշեցիք վերադառնալ քաղաքականություն:
– Այո, 1999-2003 թվականներին պատգամավոր եմ եղել, բազմաթիվ օրենսդրական նախաձեռնությունների հեղինակ եմ, նաեւ հայ-իրաքյան բարեկամական պատգամավորական խմբի ղեկավարն եմ եղել: Հայ եւ իրաքցի ժողովուրդների միջեւ բարեկամության հաստատման ուղղությամբ պատգամավորական խումբը բավական արդյունավետ աշխատանք է տարել: Այնուհետեւ հասարակական գործունեությամբ եմ զբաղվել, ԵԿՄ փոխնախագահն եմ: Նորից խորհրդարան գնալու որոշումս վերջնականապես ձեւավորվեց ապրիլյան դեպքերից հետո: Որոշակի հետեւություններ պետք էր անել. ես եկա այն եզրակացության, որ իմ ուժը, եռանդը եւ հնարավորությունները խորհրդարանում պետք է օգտագործել:
– Այսինքն՝ Դուք կարծում եք, որ ապրիլյան իրավիճակը ստեղծվեց նաեւ այն պատճառով, որ թերի օրենսդրական դա՞շտ ունենք:
– Ապրիլյան պատերազմը կատալիզատոր էր: Այո, որոշակի անելիքներ կան նաեւ խորհրդարանում` երկրապահ կամավորականների, մեր ազատամարտիկների, զինվորականների շահերի ներկայացման եւ պատշաճ պաշտպանության առումով: Ես դրական եմ համարում զորավար Մանվել Գրիգորյանի հեղինակած` երկրապահ կամավորականների մասին օրենքի ընդունումը: Դրանով ամրագրվեց այդ մարդկանց կարգավիճակը: Բայց բազմաթիվ անելիքներ կան նաեւ երկրապահների, ընդհանրապես՝ զինծառայողների սոցիալական, առողջապահական խնդիրների հստակեցման, օրենքով որոշ արտոնությունների ամրագրման եւ այլնի մասով: Բազմաթիվ են այն ոլորտները, որտեղ աշխատանք կա անելու: Ես էլ իմ հնարավորությունները` գիտելիքն ու փորձը կարող եմ ծառայեցնել այդ գործին:
– Դուք ԵԿՄ փոխնախագահն եք, սակայն այս կազմակերպության շատ անդամներ բացառապես բացասական են ընկալվում. Սուրիկ Խաչատրյան, ԵԿՄ նախագահ Մանվել Գրիգորյան, Սեդրակ Սարոյան, Առաքել Մովսիսյան եւ այլք: Այս բացասական ֆոնը ո՞նց եք հաղթահարելու:
– Ես այդ կարծիքը չեմ կիսում, հետեւաբար որեւէ բացասական ֆոն հաղթահարելու կարիք չկա:
– Այսինքն՝ Արցախյան ազատամարտում վաստակ, անգամ ուրույն վաստակ ունենալը թույլ է տալիս մարդուն քաղաքացիական կյանքում անօրինական գործողություննե՞ր իրականացնել: Դրանք բազմաթիվ են, մամուլը քանիցս անդրադարձել է դրանց:
– Ոչինչ թույլ չի տալիս մարդուն անօրինական գործողություններ կատարել, ու ես չեմ կարծում, որ իմ մարտական ընկերներից որեւէ մեկն անօրինականություն է գործել:
– ՀՀԿ-ն իշխանության է արդեն 22 տարի` մասամբ կամ ամբողջական, եւ հասցրել է հասարակության շրջանում բավական բացասական իմիջ ձեւավորել: Վարչապետ Կարեն Կարապետյանն էլ ասաց` տնտեսությունը չափազանց ծանր վիճակում է: Ի՞նչ եք ասելու, որ մարդիկ Ձեզ՝ ՀՀԿ-ականին, հավատան ու ձայն տան:
– Նախ` ՀՀԿ-ն եկավ իշխանության ժողովրդի քվեով: Իսկ Հայաստանի վիճակը կախված է տարածաշրջանում եւ աշխարհում տեղի ունեցող գործընթացներից: Վերջին տարիների ճգնաժամը, իհարկե, ազդել է նաեւ Հայաստանի տնտեսության, երկրի զարգացման վրա: Կան եւ օբյեկտիվ, եւ սուբյեկտիվ պատճառներ, ու այն ճանապարհը, որն ընտրել ենք` իրականությունը ներկայացնել հանրությանը եւ առաջ գնալու ուղիներ առաջարկել, կարծում եմ՝ դրական արդյունք կտա: Հավատացեք, ժողովուրդը երբեք չի սխալվում: Կարծում եմ` արժանի դաշինքը կամ կուսակցությունը կստանա մեծամասնության վստահությունը եւ հնարավորություն կունենա իրականացնել երկրի կառավարումը:
– Ասում եք` ՀՀԿ-ն եկավ իշխանության ժողովրդի քվեով, բայց բոլորիս էլ հայտնի է, որ հայաստանյան գրեթե բոլոր ընտրություններն էլ կեղծիքներով են ուղեկցվել:
– Համաձայն չեմ: 1999 թվականին ՀՀԿ-ն ընտրությունների գնաց դաշինքով` ՀԺԿ-ի հետ: Ժողովուրդը իսկապես հավատաց երջանկահիշատակ Վազգեն Սարգսյանին եւ Կարեն Դեմիրճյանին եւ վստահեց նրանց: Ես հավատում եմ, որ ժողովուրդը չի սխալվում: Վստահ եմ, որ այս անգամ էլ չի սխալվելու, եթե մենք հիմնավոր ներկայացնենք մեր ծրագրերը: Ընտրարշավին մի քանի օր է մնացել` կտեսնեք:
– Արդեն լուրեր կան առաջարկվող ընտրակաշառքների աստղաբաշխական թվերի մասին: Այն տարածքում, որտեղ Դուք եք առաջադրվել վարկանիշային ընտրակարգով, Նոր Նորք-Քանաքեռ-Զեյթուն-Ավան, բավական լուրջ մրցակիցներ ունեք հենց ՀՀԿ-ից` ԴԱՀԿ-ի նախկին պետ Միհրան Պողոսյանը, Ռոբերտ Սարգսյանը՝ իր փեսա Տարոն Մարգարյանի վարչական լծակներով: Ո՞նց եք պայքարելու: Նոր Նորք վարչական շրջանի ղեկավար ձեր եղբոր ադմինիստրատիվ ռեսուրսը դերակատարում ունենալո՞ւ է:
– Այդ ընտրատարածքում ՀՀԿ-ից առաջադրված թեկնածուները 12-ն են: Ես չեմ կարծում, որ մրցակցություն է գնալու ՀՀԿ-ի վարկանիշային ցուցակով առաջադրված թեկնածուների միջեւ: Մենք բոլորս միասին բոլոր օրինական ճանապարհներն օգտագործելու ենք, որպեսզի ՀՀԿ-ն հավաքի առավելագույն ձայները: Մենք միմյանց հետ չենք մրցելու, մրցելու ենք այլ դաշինքների եւ կուսակցությունների հետ` կուսակցության ընդհանուր ծրագրով` յուրաքանչյուրս մեր տեսլականով: Ժողովուրդը կլսի բոլորին եւ ճիշտ կգնահատի: Ըստ իս՝ բավական արդյունավետ մեխանիզմ է ընտրված, որպեսզի կուսակցություններին հնարավորություն ընձեռվի իրական դերակատարում ունենալ: Ինչ վերաբերում է Նոր Նորք վարչական շրջանի ղեկավար եղբորս եւ ձեր ակնարկին` հիշեցնեմ, որ երբ 1999 թվականին ես առաջադրվեցի մեծամասնական համակարգով եւ ընտրվեցի, եղբայրս թաղապետ չէր: Այդ ժամանակ Նոր Նորքի զանգվածում մոտ 8 հազար քվե եմ ստացել, այն պարագայում, երբ իմ բոլոր մրցակիցները միասին 3 հազար քվե էին ստացել:
– Ձեր տեսլականն արդեն պատրա՞ստ է:
– Իհարկե: Մարտի 5-ից քարոզարշավը մեկնարկում է: Ակտիվորեն կներկայացնենք մեր ծրագրերն ու մոտեցումները: Ի դեպ, այդ օրն ինձ համար խորհրդանշական օր է. սպարապետ Վազգեն Սարգսյանի ծննդյան օրն է, պատանի երկրապահների երդման արարողության օրն է: Այդ խորհրդանշական սկիզբով էլ, կարծում եմ, մենք հաջող ընտրարշավ կիրականացնենք:
Զրույցը`
ՆԵԼԼԻ ԳՐԻԳՈՐՅԱՆԻ
«Առավոտ»
01,03.2017
