Մարտի մեկին Հովհաննես Շարամբեյանի անվան ժողովրդական ստեղծագործության կենտրոնում բացվեց Երևանի պետական համալսարանի պատմության թանգարանի արխիվի վարիչ, ժողովրդական վարպետ Նելլի Գևորգյանի անհատական ցուցահանդեսը:
Անհատական 15-րդ ցուցահանդեսի խորագիրն է «Սիրո թևերը»: Կոլաժներում արտացոլված են գարնանային թարմությունը, կանանց գեղեցկությունն ու հմայքը:
ՀՀ ժողովրդական արտիստ Աշոտ Ղազարյանը, որ ներկա է եղել համարյա բոլոր ցուցադրություններին, նշում է. «Ամեն անգամ մի նորություն կա, ավելանում է պրոֆեսիոնալիզմը, աշխատանքները ավելի են հղկվում. սա տրամադրություն է, որին ամեն գարուն սպասում ենք»:
«Ես իմ գործերը երաժշտության եմ նմանեցնում, նյութերը, որոնցով աշխատում եմ թվում է իրենց մեղեդին ունեն: Ու չնայած իմ գործերը հիմնականում գարնան թեմաներով են, այս անգամ մի քանի կոլաժ աշնան մոտիվներով ստացվեց, և դրանք ամենից շատ սիրեցի»:
Կարդացեք նաև
Նելլի Գևորգյանը ստեղծում է իր աշխարհը, և դա կիսում է մարդկանց հետ. «Նա ունի իր ձեռագիրը: Աշխարհի որ կետում էլ տեսնես, կհասկանաս՝ ում գործերն են»,-նշում է նկարիչ Մայիս Մխիթարյանը:
«Մեր օրերում շատ քիչ ժամանակ և հնարավորություն ունենք ոգեղենի մասին մտածելու, և սա հնարավորություն է՝ մի կարճ ժամանակով կտրվել առօրյայից և ավելացնել ժպիտները»,-առաջարկում է Հայբուսակ համալսարանի ռեկտոր Անահիտ Հարությունյանը:
Իսկ ցանկացողները դեռ ժամանակ ունեն՝ մինչև մարտի 12-ը:
Մարիամ ԽԱՉԱՏՐՅԱՆ
