ՀԱԿ խմբակցության ղեկավար Լեւոն Զուրաբյանն այսօր ԱԺ-կառավարություն հարցուպատասխանի ժամանակ վարչապետ Կարեն Կարապետյանին հարցրեց մենաշնորհատերերից:
Նա ասաց, որ օրինակ բենզինի գինը բարձրացել է, շաքարավազի գինը ընդամենը 2 շաբաթվա ընթացքում 20 դրամով բարձրացել է, մոտ 80 դրամով. այն ՀՀ-ում ավելի թանկ է, քան ՌԴ-ում կամ Վրաստանում:
Պարոն Զուրաբյանը հարցրեց. «Միգուցե դա ա՞յլ օրենքների է ենթարկվում, օրինակի համար՝ նախընտրական օրենքների, որովհետեւ մարդիկ, որոնք մենաշնորհների տերեր են, հիմա պայքարում են խորհրդարանում ընտրվելու համար: Նրանք հիմա սարքում են այն փողը, որով հետո պետք է ընտրակաշառք բաժանեն եւ գնեն այն ձայները, որոնք հետո կապահովեն իրենց համար հնարավորություն նորից օգտագործելու այդ մենաշնորհները՝ մեր ժողովրդին կեղեքելու համար»:
Վարչապետը պատասխանեց. «Եթե դուք կասկածում եք, որ սա նախընտրական է, ապա նույն տրամաբանությամբ, եթե մենք ուզում ենք մեկի սիրտը շահել նախընտրական, մեզ ձեռք չի տալիս բենզինի գինը թանկանա: Այն, որ պետք է համակարգային տնտեսության մեջ մոտենալ՝ այո, միանշանակ, միշտ»:
Կարդացեք նաև
Կարեն Կարապետյանը վստահեցրեց, որ իրենք գերիշխողների դեմ մեխանիզմ ունեն, որ զսպեն նրանց ախորժակը, եթե այն անտրամաբանական է:
Հռիփսիմե ՋԵԲԵՋՅԱՆ
