Արմավիրի մարզում նախընտրական պայքարը սպառնում է հակամարտության վերածվել: Այդ ընտրատարածքում, հիշեցնենք, ՀՀԿ-ից ռեյտինգային ընտրակարգով առաջադրվել են Նահապետ Գեւորգյանը (Նովո), Ալեքսան Պետրոսյանը (ՄԱՊ-ի Ալիկ), Սեյրան Սարոյանը, Առաքել Մովսիսյանը (Շմայս), Հրանտ Գրիգորյանը:
ԲՀԿ-ից, ռեյտինգային ընտրակարգում հիմնական թեկնածուներն են Արայիկ Աղաբաբյանը, Հակոբ Հակոբյանը (Ճոյտ) եւ Հրանտ Դավթյանը: Ընդ որում, ըստ խոսակցությունների, նախընտրական պայքարի կեղտոտ տեխնոլոգիաները ԲՀԿ-ականներն արդեն սկսել են կիրառել միմյանց դեմ: Օրեր առաջ բավական լուրջ եւ տհաճ խոսակցություն է եղել Արայիկ Աղաբաբյանի եւ Հակոբ Հակոբյանի միջեւ: Նախօրեին, պայթյունավտանգ մի իրավիճակ է առաջացել Արայիկ Աղաբաբյանի եւ Հրանտ Դավթյանի միջեւ:
Խնդիրն այն է, որ Հակոբ Հակոբյանը եւ Հրանտ Դավթյանն արդեն իսկ ոչ քաղաքակիրթ եւ ոչ կոռեկտ պայքար են տանում: Այն, որ Հրանտ Դավթյանը ընտրակաշառքներ է բաժանում արդեն երկու ամիս, Aravot.am-ն արդեն անդրադարձել է այդ հարցին:
Մարզում մեկնարկած նախընտրական մրցավազքի առիթով Aravot.am-ի հարցին, ԲՀԿ խմբակցության պատգամավոր Արայիկ Աղաբաբյանը պատասխանեց. «Ասենք, որ միապաղաղ, ամեն թեկնածու իր գործով է զբաղված, այդպես չէ: Նկատի ունենալով ստարտային իրավիճակը, նկատի ունենալով վաղվա օրը, հաստատ համոզված եմ, որ օր-օրի իրավիճակը սրվելու է: Կցանկանայի, որպեսզի այն չվերածվեր հակամարտության: Չեմ ասում, թե այս պահին պայթյունավտանգ է: Ուղղակի կցանկանայի, որպեսզի չլիներ այդպիսին»:
Կարդացեք նաև
Այս ամենի հիմքում, ըստ մեր զրուցակցի, նոր Ընտրական օրենսգիրքն է, որը նախընտրական պայքարը տանում է նախ ներկուսակցական, ապա միջկուսակցական հարթություն: Արայիկ Աղաբաբյանը եւս համոզված է, որ 100 տոկոսանոց համամասնական կոչվող այս ընտրակարգն իրականում ուժեղացված մեծամասնական համակարգ է:
Անդրադառնալով Aravot.am-ի այն տեղեկություններին, որ մարզում գազի գրասենյակների աշխատակիցներից եւ մարզպետարանից դպրոցների եւ մանկապարտեզների կոլեկտիվների ընտանիքների անդամների անուն-ազգանունները եւ անձնագրային տվյալներն են հավաքագրում, Արայիկ Աղաբաբյանն ասաց, որ ինքը նման պաշտոնական տեղեկություններ չունի, բայց չի էլ զարմանում, անցած տարիների փորձը շատ «հարուստ» է:
Այլ մանրամասները`տեսանյութում
Նելլի ԳՐԻԳՈՐՅԱՆ
