Այսօր մեկ րոպե լռությամբ Ազգային ժողովի պատգամավորները մինչ նիստը սկսելը հարգեցին Մարտի 1-ի զոհերի հիշատակը:
«Ամենակարեւորը՝ շնորհավորում ենք պատգամավոր Արմեն Ռուստամյանին՝ ծննդյան օրվա կապակցությամբ»,- զոհերի հիշատակը հարգելուց հետո ասաց ԱԺ նախագահ Գալուստ Սահակյանը՝ շնորհավորելով ՀՅԴ խմբակցության ղեկավարին:
ՀԱԿ խմբակցության քարտուղար Արամ Մանուկյանը, ցուցադրելով իր սեղանին դրված օրենքների նախագծերը՝ Գալուստ Սահակյանին ասաց. «Այս ձեւի անխղճություն, պարոն Սահակյան, մի հատ նայեք, 7 կիլո օրենքի նախագիծ է: Չենք հասցնում թերթել, վերնագրերը կարդալ: Որակը ընկնում է սրանից: Քվեարկում ենք, չգիտենք ինչ ենք քվեարկում»:
Կարդացեք նաև
Գալուստ Սահակյանը պատասխանեց. «Դրա համար բոլորը պիտի ներկա լինեն, որ օրենքները սկսենք քննարկել, հարցեր տալ: Որեւէ մեկը չի գալիս քննարկելու, պարոն Սահակյանն ի՞նչ անի»:
Արամ Մանուկյանն առաջարկեց. «Բերման ենթարկեք, ինչ անեք: Ձեր խմբակցության պատասխանատվությունն է: Մենք էլ ենք պատասխանատու, բայց ձեր պատասխանատվությունը այս առումով…հլը նայեք դահլիճին»:
Գալուստ Սահակյաննն էլ արդարացրեց ՀՀԿ-ականներին, թե մեր խմբակցությունը նախապատրաստված գալիս է, խնդիրը նա է, որ ընդդիմությունը պետք է կարողանա խնդիրներ առաջարկել:
Արամ Մանուկյանյն ասաց, որ այս քառօրյային միայն 60 օրենք է օրակարգում՝ 2000 էջ ու եթե անգամ 50 օգնական ունենա, չի հասցնի այդքան օրենքը թերթել անգամ:
Հռիփսիմե ՋԵԲԵՋՅԱՆ
