«Մարտի 1-ն ամենամեծ խարանն է, որ ունի իշխանությունը»,- «Հայելի ակումբում լրագրողների հետ հանդիպմանը հայտարարեց ՀՀ ԱԺ նախկին պատգամավոր, «Ազատ դեմոկրատների» ռեյտինգային ցուցակով Մալաթիա, Շենգավիթ համայնքներում պատգամավորության թեկնածու առաջադրված Անահիտ Բախշյանը:
Նա վստահեցրեց, որ եթե այս ընտրություններին հասարակությունն էլի ՀՀԿ-ին ձայն տա ու էլի այդ ուժը մեծամասնություն լինի ու կոնկրետ պատգամավորներով մտնի խորհրդարան, ապա «ժողովուրդ, մենք մեր ցամաք հացն այսօրվանից սկսենք ուտել»:
Տիկին Բախշյանը մտահոգություն հայտնեց, թե այժմ նոր տեսակի լարվածություն է նկատվում. «Մի գյուղում 8 թեկնածու կա միայն ՀՀԿ-ից և դրանց ընտանիքները տեսնեք՝ ոնց են իրար դեմ լարվել: Սա մի նոր տեսակի վտանգավոր երևույթ է»:
Տիկին Բախշյանը նաև հայտնեց, որ Մալաթիայի տարածքում շտաբ չի գտնում, երբ իմանում են, որ ընդդիմություն է, վարձով տարածք չեն տրամադրում: Նա մի դրվագ պատմեց. «Մեկը հարցրեց՝ ովքե՞ր են այդ «Ազատ դեմոկրատները», ասացի ընդդիմություն, ասաց՝ ես ՀՀԿ-ական եմ, երկու պարանի վրա չեմ խաղում, պարզաբանեց, թե ապարանցի է, խոսք է տվել, չի տա: Մյուսն էլ ասաց՝ հագուստի խանութ եմ բացում»:
Կարդացեք նաև
Տիկին Բախշյանը, սակայն, չի սրտնեղում ու վստահեցնում է, որ «իշխանությանն ապացուցելու է՝ առանց շտաբի, իշխանության կեղտոտ քայլերի իրենց գործն անելու են, և ժողովուրդն իրենց է վստահելու»:
Տաթև ՀԱՐՈՒԹՅՈՒՆՅԱՆ
