Սումգայիթի հայերի ցեղասպանության արխիվային փաստաթղթերն օտար լեզուներով ներկայացնելու կարիք կա: Այս մասին այսօր «Հենարան» մամուլի ակումբում ասաց պատմաբան Գեւորգ Մելքոնյանը՝ խոսելով 1988թ. փետրվարի 27-29-ը Խորհրդային Ադրբեջանի Սումգայիթ քաղաքում տեղի ունեցած հայերի սպանդի եւ տեղահանության մասին:
Նա նշեց, որ առկա նյութերն ու փաստաթղթերը հիմնականում ռուսերեն եւ հայերեն են, այլ լեզուներով եւս թարգմանելու կարիք կա: «Միայն նախորդ տարի Ադրբեջանի ակադեմիական շրջանակներում Խոջալուի դեպքերի վերաբերյալ հրատարակվել է 60-ից ավելի աշխատություն՝ տարբեր լեզուներով, բաժանվել միջազգային գիտաժողովների ժամանակ»,-որպես օրինակ նշեց Մելքոնյանը:
Նա փաստեց, որ Սումգայիթի ոճրագործությունը մինչ օրս համապատասխան դատապարտում չի գտել միջազգային հանրության կողմից. «Ինտերպոլին ինչո՞ւ չենք ներկայացնում՝ Սումգայիթի հանցագործություն կատարածներին ինչո՞ւ չեք դատապարտում եւ հրավիրում Հաագայի Արդարադատության միջազգային դատարան»:
Լուիզա ՍՈՒՔԻԱՍՅԱՆ
