«Եղած վարկերը նպատակին չեն ծառայում, մսխվում են: Մեր պարտքերի շուրջ 25 տոկոսը տրանսպորտային պարտքերն են, եթե գոնե կարողանային իրականություն դառնալ ծրագրերը, լավ համակարգ կունենայինք կոմունիկացիաների, տնտեսության զարգացման համար լավագույն միջոց է դա՞,- այսօր ԱԺ-ում հերթական վարկային ծրագրի քննարկման ժամանակ ասաց ՀԱԿ խմբակցության քարտուղար Արամ Մանուկյանը:
Նա անդրադարձավ Հյուսիս-Հարավ խայտառակ գործարքին եւ ասաց, որ այդպես էլ այդ ավտոճանապարհը չի կառուցվելու, որովհետեւ այդքան գումար է ներդրվել, դեռ ճանապարհի 10 տոկոսն էլ կառուցած չի. «Էլ չեմ ասում զոհերի մասին: Ճանապարհը բացել են ժապավենով, կամուրջները քանդել են, ճանապարհները չեն գործում ու այն վարորդները, որոնք գիտեն ճանապարհը բաց է, արագընթաց գնում են եւ խփում են արգելափակոցներին: Մի քանի օր առաջ մարդատար ավտոբուսը բախվել է եւ նորից կային վիրավորներ ու զոհեր: Սա դեռ շարունակվելու է: Սա խայտառակ բան է: Ուզում ես լավ բան անել՝ մարդիկ են զոհվում էդ ծրագրի արդյունքում: Անարդյունավետ ծրագրեր են»:
Ի պատասխան՝ տրանսպորտի, կապի եւ տեղեկատվական տեխնոլոգիաների փոխնախարար Արթուր Առաքելյանն ասաց, որ զգացմունքային են այդ գնահատականները, թե մսխվել են Հյուսիս-Հարավ ճանապարհի նորոգման գումարները. «Առ այսօր ծախսվել է 70 մլն դոլար, կառուցվել է 35 կմ ճանապարհ: Բոլոր համեմատությունները ցույց են տալիս, որ միջինացված ցուցանիշով չենք ծախսել որեւէ դոլար ավելի, քան ծախսվում է տարածաշրջանում եւ տարածաշրջանից դուրս»:
Կարդացեք նաև
Ինչ վերաբերում է վթարներին, նա ասաց, որ գրեթե բոլոր վթարներում արձանագրվում են երթեւեկության կանոնների խախտումներ: Վերանորոգվող հատվածից 1 կմ առաջ վարորդներին կա զգուշացում դանդաղեցնել արագությունը: Մինչդեռ զոհեր են լինում, որովհետեւ քաղաքացիները շատ հաճախ չեն պահպանում անվտանգ երթեւեկության կանոնները:
Հռիփսիմե ՋԵԲԵՋՅԱՆ
