Այսօր կառավարությունը ԱԺ-ի քննարկմանը ներկայացրեց Ասիական զարգացման բանկի եւ ՀՀ կառավարության միջեւ կնքված վարկային հերթական համաձայնագիրը՝ Վանաձոր-Ալավերդի-Վրաստանի սահման միջպետական ճանապարհի համար:
Տրանսպորտի , կապի եւ տեղեկատվական տեխնոլոգիաների փոխնախարար Արթուր Առաքելյանն ասաց, որ մինչեւ Բագրատաշեն անցակետը հիմնովին կնորոգվի, ճանապարհը կհամապատասխանի բարձրագույն ստանդարտների, կլինի անվտանգ եւ հարմարավետ: Հիմնովին կնորոգվեն ճանապարհի վրա գտնվող 3 թունելները, որոնք չեն համապատասխանում անվտանգության ստանդարտներին, 12 կամուրջ ամբողջությամբ կնորոգվի, արագությունը կաճի 2.5 անգամ՝ անվտանգ երթեւեկության պայմաններով:
Վարկային համաձայնագրով ստանձնվող պարտավորությունն է 44 մլն եվրո:
ՀԱԿ խմբակցության քարտուղար Արամ Մանուկյանը փոխնախարարին հարցրեց՝ այդ 44 մլն-ը ավելանո՞ւմ է 5.9 մլրդ պարտքին, տրանսպորտային համակարգի համար բերած վարկերը ընդհանուր պարտքերի մեջ որքա՞ն են կազմում:
Կարդացեք նաև
Փոխնախարարը պատասխանեց՝ իհարկե, վարկը պարտքը ավելացնում է: Իսկ թե տրանսպորտի համակարգի համար վարկերը որքան են կազմում՝ նա չգիտեր: Արթուր Առաքելյանն ասաց, որ իրենք վարկային միջոցներ սպառող գերատեսչություններից են:
Արամ Մանուկյանը դժգոհեց՝ 6 մլրդ պարտքն արդեն կարմիր գիծն անցած թիվ է: Այն վճարելու են բոլորը, բացի նրանցից, ովքեր վերցնում են այդ վարկերը:
Հռիփսիմե ՋԵԲԵՋՅԱՆ
