«Անալոգային հեռարձակողների մոտ լսարանի կորուստ կա, տեխնիկական հեղափոխությունն իր պահանջներն է բերում, որոնց անհամապատասխանությունը նպաստում է լսարանի կորստին»,-«Արմենպրեսում» այսօր լրագրողների հետ հանդիպմանն ասաց Հեռուստատեսության և ռադիոյի ազգային հանձնաժողովի անդամ Տիգրան Հակոբյանը:
Հիշեցնենք, որ 2010թ.-ից հեռարձակման թվայնացմամբ պայմանավորված՝ անալոգային հեռարձակում իրականացնող մարզային հեռուստաընկերությունները կանգնել են փակման խնդրի առաջ:
«Օրենսդրական առումով ամեն ինչ անթերի է: Արված է ամեն ինչ, որ բավարարվեն լսարանի պահանջները՝ որակյալ հեռուստահեռարձակում: Մենք հանդիպել ենք հեռուստաընկերությունների ղեկավարների հետ: Գիտենք բողոքներն ու պահանջները: Պետական մարմինների մեղք չկա այստեղ: Օրենքը նախատեսում էր, որ հանրային մուլտիպլեքսոր է լինելու, որտեղ լինելու են Երեւանի եւ մարզերի հեռուստաընկերությունները»,-նշեց Հակոբյանը:
«Հանրային մուլտիպլեքսում պետք է ընդգրկված լինի մեկ մարզային հեռուստաընկերություն: Մարզային հեռուստաընկերությունները պետք է փորձեին խոշորանալ եւ տեղ գտնել այդ մուլտիպլեքսում: Ցավոք, դա չարեցին…մեզ հարկավոր է, որ մեկ մուլտիպլեքս ծածկի ողջ ՀՀ տարածքը»,-հավելեց Տիգրան Հակոբյանը:
Կարդացեք նաև
Թե ինչու մասնավոր մուլտիպլեքսորի նախորդ մրցույթը չկայացավ, նրա խոսքով՝ հուլիսյան դեպքերն ազդեցին ներդրողների պատրաստակամության վրա: Հիշեցնենք, որ մայիսին նոր մրցույթ է հայտարարվելու:
Մանրամասն՝ տեսանյութում
Լուիզա ՍՈՒՔԻԱՍՅԱՆ
