«Մեզ համար թիվ մեկ մրցակիցը ՀՀ-ի՝ դեռեւս չլուծված խնդիրների փաթեթն է»,-«Սպուտնիկ Արմենիա» մամուլի կենտրոնում այսօր անդրադառնալով հարցին, թե ՀՀԿ-ն քաղաքական ո՞ր ուժերին է իրեն մրցակից համարում առաջիկա ԱԺ ընտրություններում, ասաց ՀՀԿ փոխնախագահ Արմեն Աշոտյանը:
«Ակնհայտ է, որ ոչ իշխանական բոլոր ուժերը կցանկանան, որ ՀՀԿ-ն իրենց դիտարկի որպես հիմնական մրցակից, բայց մենք չենք ճանաչում ոչ մեկին որպես թիվ մեկ մրցակից եւ թիրախ»,-նշեց Արմեն Աշոտյանը:
Ներկայացնելով «Անվտանգություն եւ առաջընթաց» կարգախոսը որդեգրած ՀՀԿ-ի դեռեւս չհրապարակված նախընտրական ծրագրի որոշ նպատակներ, նա տեղեկացրեց, որ կուսակցության թիվ մեկ խնդիրն է՝ առաջադրել երկրի զարգացման մոդել. «Առաջարկելու ենք ոլորտային գերակայություններ եւ զարգացման հնարավորություններ»:
Արմեն Աշոտյանի բնորոշմամբ՝ ՀՀԿ-ն միակ քաղաքական ուժն է, որն իր կարգախոսի շրջանակում ընդգրկել է ՀՀ անվտանգության ապահովման խնդիրը: «Սա թելադրված չէ այն հանգամանքով, որ նախագահը երկրի գերագույն գլխավոր հրամանատարն է, ՊՆ Վիգեն Սարգսյանն էլ՝ համամասնական ցուցակի առաջին համարը…Անվտանգությունը կարեւոր է տարածաշրջանի համար. ՀՀԿ-ն միակ ուժն է, որը կարող է տեր կանգնել այս խնդրին»,-համոզմունք հայտնեց Արմեն Աշոտյանը:
Կարդացեք նաև
Մանրամասն՝ տեսանյութում
Լուիզա ՍՈՒՔԻԱՍՅԱՆ
