Փետրվարի 27-ին «Հայելի ակումբում» հյուրընկալվել էին Հովհ. Թումանյանի անվան տիկնիկային թատրոնի տնօրեն Ռուբեն Բաբայանը եւ հոգեբան Սամվել Խուդոյանը: Նրանք խոսեցին ներքաղաքական իրավիճակի, առաջիկա ընտրությունների, քարոզարշավի ու կուսակցությունների կարգախոսների մասին: Հոգեբանը նշեց, որ կուսակցական կարգախոսներում էգոցենտրիզմի երեւույթն է տիրում. «Իրենք իրենց տեսակետից են նայում, թե ինչ է պետք ժողովրդին, նրանց կարծիքով՝ փոփոխությունը ընդամենը պաշտոնների փոփոխությունն է, նրանց կարգախոսներում արտահայտություններ են՝ մենք կարող ենք, անվտանգություն եւ այլն, սա ինքնավստահության խնդրի մասին է խոսում: Չեն կարողանում հասկանալ, թե իրականում ինչ է պետք ժողովրդին: Եվ որ ամենակարեւորն այն է, որ կարգախոսներից պակասում է արդարություն բառը, որի կարիքը ժողովուրդը շատ ունի»:
Սամվել Խուդոյանի ձեւակերպմամբ, իշխանությունը շատ լավ գիտի, որ իրեն չեն վստահում եւ չեն սիրում, դրա համար էլ թշնամանք կա հակառակ կողմի հանդեպ: «Խաբելու դիրքորոշումն էլ է առկա, ժողովրդի կողմից էլ դրա պրոյեկցիան է՝ անվստահությունը: Այս ամենի հիմքում կուզենայի բարոյական հիմքերի վրա ուշադրություն դարձնել»,-նշեց նա:
Ռուբեն Բաբայանը կատակեց, որ կարգախոսների մեծ մասնագետ չէ եւ դրանց լուրջ էլ չի վերաբերվում: «Մեծ տարբերություն կա կարգախոսների եւ ռեալ կյանքի միջեւ: Ինձ ավելի շատ անհանգստացնում է տիրող վիճակը: Մենք շատ ենք քննադատել իշխանությանը եւ ընդդիմությանը եւ անտեսել ենք հասարակության բարոյական վիճակը: Հերթեր են գոյանում փող ստանալու համար, եւ սարսափելին այն է, որ դա արդարացնում են, արդարացումը դարձել է մեր կյանքի գլխավոր թեզը, իսկ եթե կա փոքր չափով արդարացման տեղ, որ մարդը ուտելու փող չունի, դրա համար է կաշառք վերցնում, երեխայի ուսման վարձ չունի եւ այլն, բարոյականությունը սկսում է բաժանվել տարբեր ճամբարների մեջ գտնվելու, սոցիալական վիճակի: Մենք միշտ մեր մեղքերի պատճառը փնտրում ենք մեզանից դուրս, դրա համար էլ մեզ զրկում ենք լավ ապրելու հնարավորությունից: Մենք ներսից դադարել ենք փոխվել դեպի լավը:
Կարդացեք նաև
Օրինակ, Ֆրանսիական հեղափոխությունը հոյակապ կարգախոս բերեց՝ ազատություն, հավասարություն, եղբայրություն, ամերիկյան սահմանադրությունն էլ ասում է՝ ազատություն յուրաքանչյուրին, կրթություն՝ բոլորին: Մեր կուսակցություններից որեւէ մեկի կարգախոսի մեջ չկա կրթություն բառը: Մենք չենք ունենա լավ երկիր, միայն բարձր կրթական ցենզ ունեցող հասարակությունը կարող է պայքարել եւ ստեղծել նորմալ պետություն»,- ասաց ռեժիսորը:
Ռուբեն Բաբայանը հավելում է. «Շատ է տարածվում հասարակության մեջ հերթական թեզը, որ մեզանից որեւէ բան կախված չէ: Նման գաղափարով շարժվողներին հակադարձեմ՝ եթե ձեզանից ոչինչ կախված չլիներ, ձեզ փող չէին տա: Բոլոր խոսքերը, որ ինձանից ոչինչ կախված չէ, ճորտի հոգեբանության արդյունք է»:
Սամվել Խուդոյանը կեսկատակ-կեսլուրջ առաջակում է բոլորից էլ ընտրակաշառք վերցնել, ասում է՝ աճուրդ է սկսվել՝ ով ավելի շատ: «Թող ժողովուրդն էլ իրենց ձեռ առնի»,-ասում է հոգեբանը: Բայց նաեւ փաստում է՝ բարոյականության հետընթաց է գրանցել: «Մի նայեք, տեսեք, թե իշխանությունների ելույթների տակ ինչեր են գրած, կանայք են անգամ հայհոյում, հզոր ագրեսիա, միտում կա, ժողովուրդը վրդովված է, անելանելիության զգացողություն ունի, հուսահատություն է: Օրինակ, Քոչարյանի ընտրություններին՝ 98-ին հոգեբաններ էին կանչել, ժողովրդին իրենցով անելու համար, հիմա այդ հարցը շպրտված է մի կողմ, նույնը փողով, լցոնումներով են անում»:
Ռուբեն Բաբայանը ռեպլիկ արեց. «Իշխանությունը մտածում է՝ ինչո՞ւ հոգեբան կանչել, երբ կարելի է մի հոգեբանի փողով 100 հոգու առնել»:
Գոհար ՀԱԿՈԲՅԱՆ
