Իրանի արտաքին գործերի նախարարության մամուլի խոսնակ Բահրամ Քասեմին հանդես է եկել հայտարարությամբ, որում Հայաստանին և Ադրբեջանին «զսպվածության» կոչ է արել:
«Իրանը հյուսիսային իր երկու հարևաններին կոչ է անում անել առավելագույնը երկխոսության և բանակցությունների միջոցով տեղում իրավիճակը կայունացնելու համար»,-ասել է Քասեմին և հավելել, որ իրանական կողմը պատրաստակամ է «երկու կողմերի օգնությամբ» տարածաշրջանում խաղաղություն և անվտանգություն հաստատել։
Ի տարբերություն Իրանի կոչին, որը ուղղված է հակամարտող երկու կողմերին, Թուրքիան հանդես է եկել միակողմանի, ոչ հավասարակշիռ հայտարարությամբ: Թուրքիայի արտաքին գործերի նախարարությունը փետրվարի 26-ին դատապարտել է արցախա-ադրբեջանական հակամարտ զորքերի շփման գծում փետրվարի 24-25-ը տեղի ունեցած «ինտենսիվ գնդակոծությունը»՝ մեղադրելով Հայաստանին և «կոչ անելով նրան պահպանել հրադադարի ռեժիմը, անհապաղ դադարեցնել բռնությունը»:
Թուրքիան նաև ցավակցել է Ադրբեջանին՝ զոհվածներին անվանելով «եղբայրներ»: Նշվում է նաև, որ Թուրքիայի ԱԳ նախարար Մևլութ Չավուշօղլուն իրավիճակի վերաբերյալ հեռախոսազրույց է ունեցել ադրբեջանցի իր գործընկեր Էլմար Մամեդյարովի հետ։
Կարդացեք նաև
Պատրաստեց՝ Վիկտորյա ԱՆԴՐԵԱՍՅԱՆԸ
