«Ազգային անվտանգություն» կուսակցության նախագահ Գառնիկ Իսագուլյանն այսօր «Հայք» տեղեկատվական կենտրոնում լրագրողների հետ հանդիպմանն անդրադարձավ «ՕՐՕ» դաշինքի ներկայացուցիչ, «Համախմբում» կուսակցության նախագահ Վարդան Օսկանյանի որդու ձերբակալության դեպքին:
«Այդ ժամանակ ԼՂՀ-ում էինք: Սեղանի շուրջը նստած էինք ես, Դավիթ Շահնազարյանը, Վիտալի Բալասանյանը…Շահնազարյանն ասաց՝ հայտարարություն է տարածվել, որ ձերբակալվել է Վարդան Օսկանյանի տղան, եւ ասաց, որ դա շատ վատ երեւույթ է: Պետք է արագ պարզել՝ ի՞նչ է տեղի ունեցել, որովհետեւ այն կարող է շահարկվել»,-պատմեց Գառնիկ Իսագուլյանը:
«Զանգել եմ Բակո Սահակյանին, նա ասել է, որ անմիջապես կապնվեմ Երեւանի հետ: Կապնվել եմ ում հետ պետք է, պարզվել է՝ Սերժ Սարգսյանը տեղյակ էլ չի եղել, որ որդին ձերբակալվել է, ինձանից է նա իմացել այդ մասին»,-շարունակեց Գառնիկ Իսագուլյանը:
Նա նշեց, որ լավ հարաբերություններ ունի Օսկանյանի հետ, բայց իրավիճակը շահարկելը ճիշտ չէ. «Լուրեր են տարածվում, թե ցուցում են տվել ճնշում գործադրել ընդդիմադիր դաշինքի վրա՝ որդուն կալանավորելով: Բայց կրկնում եմ՝ նախագաhն ինձանից է դա իմացել»:
Կարդացեք նաև
Ըստ Իսագուլյանի՝ Օսկանյանի որդուն ստորագրությամբ բաց թողնելը չի նշանակում, թե «որեւէ մեկից վախեցել են»: «Մի արեք հանցագործություններ, անկախ նրանից, թե ում որդին եք»,-կոչ արեց բանախոսը:
Լուիզա ՍՈՒՔԻԱՍՅԱՆ
