Բաքվում ազատազրկման մեջ գտնվող բլոգեր Ալեքսանդր Լապշինը առողջական վիճակից և պահելու վայրի պայմաններից բողոքներ չունի: Այս մասին Trend-ի հետ զրույցում ասել է նրա ընտանիքի կողմից վարձված նոր փաստաբանը, որի անունը գործակալությունը չի նշում:
Փաստաբանը հաստատել է, որ պայմանագիր է կնքել Լապշինի մոր հետ, և պատմել, որ հանդիպել է բլոգերի հետ Բաքվի №1 մեկուսարանում:
«Նրա մայրը Բաքու է ժամանել և ինձ հետ պայմանագիր կնքել: Այս պահին ես եմ պաշտպանում Ալեքսանդր Լապշինի իրավունքները: Ես արդեն ներկայացրել եմ իմ օրդերը քննությանը: Նաև հանդիպել եմ Լապշինի հետ, հետաքրքրվել պահվելու վայրի պայմանների և առողջական վիճակի մասին: Այդ առումով նա որևէ բողոք չունի: Լապշինի գործը հսկողության տակ են պահում նաև ռուսական և բելառուսական դեսպանատները: Ամեն ինչ կարգին է, որևէ խնդիր չկա»,- ասել է փաստաբանը:
Փաստաբանը նաև հիշեցրել է, որ Լապշինի նախորդ փաստաբանը՝ Սաֆար Հուսեյնովը նշանակվել էր պետության կողմից, և առայժմ տեղեկություն չկա՝ արդյոք Լապշինը հրաժարվել է նրա ծառայություններից:
Կարդացեք նաև
«Քննությունը շարունակվում է: Այն կարող է ավարտվել առաջիկայում, բայց կոնկրետ երբ՝ ես դեռ չգիտեմ»,- ասել է փաստաբանը:
Հիշեցնենք, ավելի վաղ հաղորդվում էր, որ Լապշինի շահերը կարող է պաշտպանել միայն Ադրբեջանի քաղաքացի հանդիսացող փաստաբան:
Պատրաստեց՝ Վիկտորյա ԱՆԴՐԵԱՍՅԱՆԸ
