Ադրբեջանի գլխավոր դատախազությունը քրեական գործ է հարուցել մի շարք օտարերկրացիների, այդ թվում Եվրախորհրդարանի 3 անդամների դեմ՝ Լեռնային Ղարաբաղ այցելելու համար: Այս մասին հայտնում է Trend-ը՝ վկայակոչելով Գլխավոր դատախազության մամուլի ծառայությունը:
Հայտարարության մեջ նշվում է, որ «հիմնավոր կասկածներ» կան առ այն, որ Եվրախորհրդարանի անդամներ՝ Լյուքսեմբուրգի քաղաքացի Ֆրանկ Էնգելը, Կիպրոսի քաղաքացի Էլենի Տեոխարուսը և Չեխիայի քաղաքացի Յարոմիր Շտետինան ԶԼՄ-ների հետ զրույցներում Լեռնային Ղարաբաղը հայտարարել են որպես անկախ պետություն, բազմիցս այցելել են այդ տարածք, իսկ փետրվարի 20-ին որպես դիտորդ ներկա են գտնվել այնտեղ անցկացվող սահմանադրական հանրաքվեին:
«Նշված անձանց նկատմամբ, որոնք մեղադրվում են Ադրբեջանի Հանրապետության Քրեական օրենսգրքի համապատասխան հոդվածներով, դատարանի որոշմամբ որպես խափանման միջոց է ընտրվել կալանքը, համապատասխան հայց է ուղարկվել Ինտերպոլին՝ նրանց նկատմամբ միջազգային հետախուզություն հայտարարելու խնդրանքով»,- ասվում է դատախազության հաղորդագրության մեջ:
Կարդացեք նաև
Պատրաստեց՝ Վիկտորյա ԱՆԴՐԵԱՍՅԱՆԸ
