«Ցավոք, այսօր ամեն ինչ այնքան է այլասերվել, որ լուրջ խնդիրների մասին խոսելը նոնսենս է: Երբ տեսնում ենք, թե ովքեր են տարածքային ընտրությունների արդյունքում գալու խորհրդարան` այս խորհրդարանն ավելի վատն է լինելու: Ամեն ինչ փողի հույսին է»,- «Առավոտի» հետ զրույցում ասաց Հայաստանի Դեմոկրատական կուսակցության նախագահ Արամ Սարգսյանը:
Տարածքային ցուցակները նա ծուղակ է համարում ու չի բացառում, որ հենց իշխանությունն այդ ծուղակում հայտնվի. «Մեկին պատգամավոր են խոստացել, մյուսին՝ համայնքի ղեկավար, երրորդին՝ այլ բան, եւ սեփական բարիքի համար նրանք միեւնույն տարածքում կռվի մեջ են մտնելու: Մի տարածքում կարող է 60-ից ավելի թեկնածու լինել: Հասկանալի է, որ բոլորն էլ ինչ-ինչ ձեւերով պետք է փորձեն ինչ-որ բանի հասնել: Պատկերացրեք ժողովրդի խառնաշփոթը` ո՞ւմ ձայն տան, ո՞նց տան, ինչի՞ համար տան: Բոլորը շռայլ գումարներ են խոստանում, պարտքերն ու վարկերը մարել են խոստանում, գաղափարների մասին ոչ ոք չի խոսում»:
Կարդացեք նաև
«Առավոտ»
23,02.2017
